કાશ્મીર યુનિવર્સિટી અને IIS ગુજરાત યુનિવર્સિટીએ MOU પર હસ્તાક્ષર કર્યા

ઈન્ડિયન ઈન્સ્ટિટ્યૂટ ઓફ સસ્ટેનેબિલિટી કાશ્મીર યુનિવર્સિટી, અને IIS ગુજરાત યુનિવર્સિટીએ સાતત્યપૂર્ણ વિકાસ, નવીનતા, કાર્યલક્ષી સંશોધનને આગળ વધારવા માટે  MOU પર હસ્તાક્ષર કર્યા હતા. આ અંગે કાશ્મીર યુનિવર્સિટીના વાઇસ ચાન્સેલર પ્રોફેસર નિલોફર ખાને જણાવ્યું હતું કે ટકાઉ વિકાસ માટે સર્વગ્રાહી અભિગમ વિકસાવવામાં મદદ કરવા માટે IIS, ગુજરાત યુનિવર્સિટી સાથે જોડાણ કરવું એ એક મહત્વપૂર્ણ પ્રસંગ છે. તેમણે ઉમેર્યુ હતું કે કાશ્મીર યુનિવર્સિટી યુજીસીની માર્ગદર્શિકા અનુસાર વિશ્વની 500થી વધુ યુનિવર્સિટીઓ સાથે આંતરરાષ્ટ્રીય જોડાણ માટે લાયક ઠરે છે અને દેશ-વિદેશની પ્રતિષ્ઠિત સંસ્થાઓ સાથે તેના જોડાણો વિકસાવવા અને પ્રગતિમાં અગ્રેસર બનવા માટે પ્રતિબદ્ધ છે. તો ગુજરાત યુનિવર્સિટીના વાઇસ ચાન્સેલર પ્રોફેસર હિમાંશુ પંડ્યાએ જણાવ્યું હતું કે આ એમઓયુના આધારે બંને સંસ્થાઓ ગુજરાત અને જમ્મુ અને કશ્મીર બંને પ્રદેશોના વિકાસ માટે પરસ્પર હિતના વિવિધ ક્ષેત્રોમાં ઘણું મૂલ્ય ઉભું કરી શકે છે અને તેમાં યોગદાન આપી શકે છે.