ગાંધીનગરના કુડાસણમાં નિર્માણાધીન બિલ્ડિંગનો સ્લેબ ધરાશાયી થતા ફસાયેલા તમામ મજૂરોનો બચાવ, કોઈ જાનહાનિ નહીં

ગુજરાતના ગાંધીનગરના કુડાસણ વિસ્તારમાં એક નિર્માણાધીન ઇમારતનો એક સ્લેબ ધરાશાયી થવાથી ફસાયેલા તમામ મજૂરોને હેમખેમ બચાવી લેવામાં આવ્યા છે. 9 સપ્ટેમ્બરની મોડી રાત્રે યુદ્ધના ધોરણે ચલાવાયેલા બચાવ ઓપરેશન બાદ રાજ્ય સરકારે કોઈ જાનહાનિ થઈ ન હોવાની સત્તાવાર જાહેરાત કરી છે.

નાયબ મુખ્યમંત્રી હર્ષ સંઘવીએ ઘટનાસ્થળ અને ગાંધીનગર સિવિલ હોસ્પિટલ બંનેની મુલાકાત લીધા બાદ જણાવ્યું હતું કે, આ દુર્ઘટનામાં શરૂઆતમાં આશરે 15 મજૂરો ઈજાગ્રસ્ત થયા હોવાના અહેવાલ હતા. તેમાંથી બે મજૂરોને સંપૂર્ણ સ્વસ્થ જણાતા રજા આપવામાં આવી છે, જ્યારે અન્ય ઈજાગ્રસ્ત મજૂરો સિવિલ હોસ્પિટલમાં સારવાર હેઠળ છે. 

આ દુર્ઘટના બુધવારે મોડી સાંજે કુડાસણ ખાતે આવેલા 'બોસ્કી ધ એમ્પાયર' નામના કોમર્શિયલ બિલ્ડિંગના નિર્માણ સ્થળે બની હતી. સ્લેબનો એક ભાગ અચાનક તૂટી પડવાથી મજૂરો કાટમાળ નીચે ફસાયા હતા, જેના પગલે સ્થાનિક વહીવટીતંત્ર, પોલીસ અને ફાયર બ્રિગેડની ટીમોએ તાત્કાલિક બચાવ કામગીરી શરૂ કરી દીધી હતી. ગાંધીનગર મ્યુનિસિપલ કોર્પોરેશન, ફાયર બ્રિગેડ અને ડિઝાસ્ટર મેનેજમેન્ટની ટીમોએ કાટમાળ હટાવવા અને નીચે ફસાયેલા મજૂરો સુધી પહોંચવા માટે ક્રેન અને અન્ય આધુનિક સાધનોનો ઉપયોગ કર્યો હતો. બચાવ કરાયેલા તમામ લોકોને એમ્બ્યુલન્સ દ્વારા તબીબી સારવાર માટે ગાંધીનગર સિવિલ હોસ્પિટલ ખસેડવામાં આવ્યા હતા.

નાયબ મુખ્યમંત્રીએ જણાવ્યું હતું કે, "સમયસર હાથ ધરાયેલી બચાવ કામગીરીને કારણે આ દુર્ઘટનામાં કોઈ જાનહાનિ થઈ નથી." ગૃહ વિભાગના અધિક મુખ્ય સચિવ સંજીવ કુમાર, પોલીસ મહાનિર્દેશક (DGP) જ્ઞાનેન્દ્ર સિંહ મલિક, જિલ્લા કલેક્ટર, મ્યુનિસિપલ કમિશનર અને વરિષ્ઠ પોલીસ અધિકારીઓ સહિતના ઉચ્ચ અધિકારીઓએ આ સમગ્ર ઓપરેશન પર નજર રાખી હતી.

ભાજપના ધારાસભ્ય રીટા પટેલે જણાવ્યું હતું કે, સ્થાનિક રહેવાસીઓએ તેમને માહિતી આપી હતી કે આ નિર્માણ સ્થળે દરરોજ આશરે 20 થી 22 લોકો કામ કરતા હતા. તેમના જણાવ્યા મુજબ, કાટમાળમાંથી તમામ મજૂરોને બહાર કાઢીને સિવિલ હોસ્પિટલ ખસેડવામાં આવ્યા છે અને કોઈની પણ હાલત ગંભીર નથી.

રીટા પટેલે ઉમેર્યું, "આ ઘટના લગભગ ત્રણ કલાક પહેલા બની હતી. અમે બહાર હતા ત્યારે અમને ફોન પર કુડાસણ વિસ્તારમાં આ અકસ્માત થયાની જાણકારી મળી. સ્થાનિકો પાસેથી અમને માહિતી મળી કે અહીં રોજ 20-22 લોકો કામ કરતા હતા. અત્યાર સુધીમાં 13 લોકોને કાટમાળમાંથી બહાર કાઢી સિવિલ હોસ્પિટલ ખસેડવામાં આવ્યા છે. સદનસીબે કોઈની પણ હાલત ગંભીર નથી, બધા સારવાર લઈ રહ્યા છે. સિવિલ હોસ્પિટલમાં તબીબોની વિશેષ ટીમ હાજર છે, જેઓ યોગ્ય કાળજી લઈ રહી છે."

ઘટનાની જાણ થતાં જ આરોગ્ય મંત્રી પ્રફુલ પાનશેરિયા પણ ગાંધીનગર સિવિલ હોસ્પિટલ પહોંચ્યા હતા અને ઈજાગ્રસ્તોની સારવારનું નિરીક્ષણ કર્યું હતું. મજૂરોને સમયસર તબીબી સહાય મળી રહે તે માટે વિશેષ ડોક્ટરોની ટીમ તૈનાત કરવામાં આવી હતી. અગાઉ મળેલા પ્રાથમિક અહેવાલોમાં 10થી 15 મજૂરો ફસાયા હોવાની આશંકા વ્યક્ત કરવામાં આવી હતી, જે બાદ આ નવું સત્તાવાર નિવેદન સામે આવ્યું છે. બુધવારે રાત્રે આશરે 9:15 વાગ્યે આ દુર્ઘટના સર્જાઈ હતી, ત્યારબાદ કટોકટીની ટીમો તાત્કાલિક ઘટનાસ્થળે દોડી આવી હતી અને ઈજાગ્રસ્તોને લઈ જવા માટે એમ્બ્યુલન્સ કામે લગાડવામાં આવી હતી.

હવે સત્તાવાળાઓ દ્વારા આ અકસ્માતની ઝીણવટભરી તપાસના આદેશ આપવામાં આવ્યા છે. અધિકારીઓ એ તપાસ કરશે કે નિર્માણ સ્થળે નિર્ધારિત સલામતી ધોરણોનું પાલન કરવામાં આવ્યું હતું કે કેમ, તેમજ સેન્ટ્રિંગ અને સ્લેબના કામમાં કોઈ ગુણવત્તા સંબંધિત ખામી કે અન્ય કોઈ ક્ષતિ હતી કે કેમ. નાયબ મુખ્યમંત્રી હર્ષ સંઘવીએ જણાવ્યું હતું કે તપાસના અહેવાલના આધારે યોગ્ય કાનૂની કાર્યવાહી કરવામાં આવશે. જિલ્લા વહીવટીતંત્ર, મ્યુનિસિપલ સત્તાવાળાઓ અને વરિષ્ઠ પોલીસ અધિકારીઓ દ્વારા સ્થિતિ પર સતત નજર રાખવામાં આવી રહી છે.