ગાંધીનગર: અટલજીની જન્મજયંતિ પર મુખ્યમંત્રીએ આપી મોટી ભેટ

ગાંધીનગર: અટલજીની જન્મજયંતિ પર મુખ્યમંત્રીએ કરી મોટી ભેટ, 'ચ-3' સર્કલ પર પ્રતિમાનું અનાવરણ અને સુશાસન થીમનું લોકાર્પણ

પૂર્વ પ્રધાનમંત્રી અટલ બિહારી વાજપેયીજીની જન્મજયંતિ અને 'સુશાસન દિવસ' નિમિત્તે આજે રાજ્ય પાટનગર ગાંધીનગર ખાતે ભવ્ય ઉજવણી કરવામાં આવી હતી. મુખ્યમંત્રી ભૂપેન્દ્ર પટેલે આ ખાસ અવસરે અટલજીને શ્રદ્ધાંજલિ અર્પતા શહેરના મહત્વના એવા 'ચ-3' સર્કલ ખાતે તેમની ભવ્ય પ્રતિમાનું અનાવરણ કર્યું હતું.

રૂપિયા 35 લાખના ખર્ચે 'સુશાસન સર્કલ' તૈયાર
ગાંધીનગરના 'ચ-3' સર્કલને એક નવું રૂપ આપવામાં આવ્યું છે. અંદાજે 35 લાખ રૂપિયાના ખર્ચે આ સર્કલને 'સુશાસન' (Good Governance) ની થીમ પર ડેવલપ કરવામાં આવ્યું છે. આ સર્કલ હવે અટલજીના આદર્શો અને તેમના સુશાસનના વિઝનને જીવંત રાખશે. લોકાર્પણ પ્રસંગે મુખ્યમંત્રીની સાથે મંત્રીમંડળના સભ્યો અને ઉચ્ચ અધિકારીઓ પણ ઉપસ્થિત રહ્યા હતા.

વહીવટી સુધારા અને મહત્વના વિમોચન

પ્રતિમા અનાવરણ બાદ આયોજિત કાર્યક્રમમાં વહીવટી કાર્યક્ષમતા વધારવા માટે અનેક મહત્વના પગલાં લેવામાં આવ્યા હતા. રાજ્ય સરકાર દ્વારા યોજાયેલી 12મી ચિંતન શિબિરના નિષ્કર્ષો અને ફલશ્રુતિને સમાવતી પુસ્તિકાનું મુખ્યમંત્રીના હસ્તે વિમોચન કરાયું હતું. વહીવટમાં ઉત્કૃષ્ટ કામગીરી અને નવીન પ્રયોગોના સંગ્રહ (Best Practices) નું પણ વિમોચન કરવામાં આવ્યું હતું, જે અન્ય વિભાગો માટે માર્ગદર્શક બનશે. રાજ્યના વિકાસ અને પ્રશાસનિક તાલીમને વધુ સુદ્રઢ બનાવવા માટે દેશની જાણીતી પ્રીમિયર સંસ્થાઓ સાથે MOU (મેમોરેન્ડમ ઓફ અંડરસ્ટેન્ડિંગ) કરવામાં આવ્યા હતા.

સુશાસનનો સંકલ્પ

આ પ્રસંગે મુખ્યમંત્રીએ જણાવ્યું હતું કે, અટલજીએ બતાવેલા સુશાસનના માર્ગ પર ચાલીને ગુજરાત સરકાર 'છેવાડાના માનવી સુધી સુવિધાઓ પહોંચાડવા' માટે કટિબદ્ધ છે. ટેકનોલોજી અને પારદર્શિતાના ઉપયોગ દ્વારા વહીવટને વધુ લોકાભિમુખ બનાવવો એ જ સાચા અર્થમાં અટલજીને શ્રદ્ધાંજલિ છે.