ગીરમાંથી વિલુપ્ત થયેલા ‘ચિલોત્રા’ પક્ષીનો કલરવ: ગુજરાત વન વિભાગનો રિ-ઇન્ટ્રોડક્શન પ્રોજેક્ટ થયો સુપરહિટ

ગીરમાંથી વિલુપ્ત થયેલા ‘ચિલોત્રા’ પક્ષીનો કલરવ: ગુજરાત વન વિભાગનો રિ-ઇન્ટ્રોડક્શન પ્રોજેક્ટ થયો સુપરહિટ

ગુજરાત વન વિભાગ દ્વારા વન્યજીવ સંરક્ષણ ક્ષેત્રે એક અદ્ભુત ઐતિહાસિક સફળતા હાંસલ કરવામાં આવી છે. ગીરના જંગલોમાંથી સંપૂર્ણપણે વિલુપ્ત થઈ ગયેલા ‘ઇન્ડિયન ગ્રે હોર્નબિલ’ (ચિલોત્રો) પક્ષીઓ ફરી એકવાર ગીરના આકાશમાં વિહાર કરતા અને કલરવ કરતા થયા છે. વન વિભાગના ખાસ સંરક્ષણ અભિયાન ‘રિ-ઇન્ટ્રોડક્શન પ્રોજેક્ટ’ના કારણે આ અશક્ય કામગીરી શક્ય બની છે.

અરવલ્લીથી ગીર સુધીની સફળ સફર

ગીરમાં આ પ્રજાતિનું અસ્તિત્વ પાછું લાવવા માટે વન વિભાગે એક લાંબાગાળાનું આયોજન કર્યું હતું.  વર્ષ 2021માં આ ભગીરથ પ્રયાસ શરૂ કરવામાં આવ્યો હતો. ગુજરાતના જ અરવલ્લીના જંગલોમાંથી ઇન્ડિયન ગ્રે હોર્નબિલ પક્ષીઓને વૈજ્ઞાનિક પદ્ધતિથી લાવવામાં આવ્યા હતા. વન વિભાગ દ્વારા અત્યાર સુધીમાં તબક્કાવાર કુલ 40 ચિલોત્રા પક્ષીઓને ગીરના ગાઢ જંગલમાં મુક્ત કરવામાં આવ્યા છે.

વૈજ્ઞાનિક સંશોધનમાં મોટી સફળતાની પુષ્ટિ

તાજેતરમાં થયેલા એક સત્તાવાર અભ્યાસમાં ચિલોત્રા પક્ષીઓ અંગે ખૂબ જ હકારાત્મક અને પ્રોત્સાહક પરિણામો સામે આવ્યા છે.

સ્થાયી વસવાટ અને પ્રજનન:

ગીરના જંગલમાં મુક્ત કરાયેલા આ ચિલોત્રા પક્ષીઓ હવે અહીંના વાતાવરણ અને ઇકોસિસ્ટમ સાથે સંપૂર્ણપણે અનુકૂળ (સ્થાયી) થઈ ગયા છે. તેઓ માત્ર ત્યાં રહેતા જ નથી, પરંતુ કુદરતી રીતે પોતાના માળા પણ બનાવી રહ્યા છે અને સફળતાપૂર્વક પ્રજનન  કરીને વંશવેલો વધારી રહ્યા છે.