જનગણના-2027 અંતર્ગત અમદાવાદ કલેક્ટર અને જિલ્લા મેજિસ્ટ્રેટ ભવ્ય વર્મા ઓનલાઇન સ્વ-ગણતરી પ્રક્રિયામાં સહભાગી થયા

અમદાવાદ કલેક્ટર અને જિલ્લા મેજિસ્ટ્રેટ ભવ્ય વર્મા વસ્તી ગણતરી-2027 અંતર્ગત ઓનલાઈન પોર્ટલ પર પોતાની વિગતો ભરીને સ્વ-ગણતરી પ્રક્રિયામાં સહભાગી થયા હતા.

આ સાથે જ તેમણે શહેર-જિલ્લાના તમામ નાગરિકોને પણ ઓનલાઈન નોંધણી કરવા અનુરોધ કર્યો હતો. આ અંગે નાગરિકોને અપીલ કરતાં તેમણે કહ્યું કે દેશની જનગણના એ વિકાસની જનગણના છે. આગામી તા. 1 થી 30 જૂન દરમિયાનના પ્રથમ તબક્કામાં ગણતરીદારો દરેક ઘરે આવશે અને વિગતો એકત્ર કરશે. ત્યારે દરેક નાગરિક પોતાની સચોટ માહિતી તેમાં નોંધાવે અને ભારત સરકારની આ મહત્વપૂર્ણ પ્રક્રિયામાં યોગદાન આપે, તે આવશ્યક છે. સફળ, સચોટ અને સર્વસમાવેશી જનગણના માટે આ અત્યંત જરૂરી છે.

તેમણે ઉમેર્યું કે વસ્તી ગણતરી-2027 સંપૂર્ણપણે ડિજિટલ મોડથી પોર્ટલ અને મોબાઇલ આધારિત કરવામાં આવી રહી છે. વધુમાં, આગામી તા. 31 મે, 2026 સુધી નાગરિકો https://se.census.gov.in/ પરથી જરૂરી માર્ગદર્શન દ્વારા તેમની સ્વ-ગણતરી પૂર્ણ કરી શકે છે.આ પ્રકારે નાગરિકો સરળ અને સુરક્ષિત રીતે ડિજિટલ પ્લેટફોર્મ થકી, ગમે ત્યાંથી પોતાની માહિતી ઓનલાઇન સબમિટ કરી શકે છે. આવી સક્રીય નાગરિક ભાગીદારીથી આ સમગ્ર કામગીરી વધુ ઝડપી અને સચોટ બનશે.આમ, રાષ્ટ્રીય સ્તરની આ મહત્ત્વની કવાયતમાં શહેર-જિલ્લાના તમામ નાગરિકોને સક્રીયપણે ભાગ લેવા કલેક્ટર અને જિલ્લા મેજિસ્ટ્રેટ દ્વારા અનુરોધ કરવામાં આવ્યો હતો.