જામનગરમાં કારગિલ વિજય દિવસ કરાઈ ઉજવણી, શહીદોને અર્પણ કરાઈ શ્રદ્ધાંજલિ

હાલાર જિલ્લા માજી સૈનિક મંડળે આજે 'વિજય કારગિલ દિવસ' નિમિત્તે જામનગર જિલ્લામાં કારગિલ યુદ્ધના શહીદ વીર જવાનોને ભાવભીની શ્રદ્ધાંજલિ અર્પણ કરવામાં આવી. આ પ્રસંગે, રણમલ તળાવ, ગેટ નં.૧, શહીદ સ્મારક ખાતે આજે સવારે એક વિશેષ કાર્યક્રમનું આયોજન કરવામાં આવ્યું હતું.

હાલાર જિલ્લા માજી સૈનિક મંડળ, જામનગરના પ્રમુખ  ભરતસિંહ એન. જાડેજાએ આયોજિત આ કાર્યક્રમમાં, જિલ્લાના નાગરિકો, સૈન્ય અધિકારીઓ અને અગ્રણીઓએ મોટી સંખ્યામાં હાજરી આપી હતી. ઉપસ્થિત સૌએ વીર શહીદોને પુષ્પાંજલિ અર્પણ કરી તેમના અપ્રતિમ શૌર્ય અને બલિદાનને યાદ કર્યા હતા.

આ અવસરે, દેશની રક્ષા માટે પ્રાણની આહુતિ આપનાર સૈનિકોના પરિવારો પ્રત્યે કૃતજ્ઞતા વ્યક્ત કરવામાં આવી હતી અને યુવાનોને તેમના આદર્શોમાંથી પ્રેરણા લેવા હાકલ કરવામાં આવી હતી. આ શ્રદ્ધાંજલિ સમારોહ દ્વારા દેશભક્તિના ભાવને વધુ મજબૂત બનાવવામાં આવ્યો, અને વીર જવાનોનું બલિદાન હંમેશા આપણા હૃદયમાં અમર રહેશે તેવી લાગણી વ્યક્ત કરવામાં આવી.