જામનગર જિલ્લામાં પાણી વિતરણની વ્યવસ્થાઓ અંગે શિક્ષણ રાજ્ય મંત્રી રિવાબા જાડેજાના અધ્યક્ષસ્થાને સમીક્ષા બેઠક યોજાઈ

જામનગર સર્કિટ હાઉસ ખાતે શિક્ષણ રાજ્ય મંત્રી રિવાબા જાડેજાના અધ્યક્ષસ્થાને જિલ્લામાં પાણી વિતરણની વ્યવસ્થાઓ અંગે એક મહત્વપૂર્ણ સમીક્ષા બેઠક યોજાઈ હતી.

જામનગર જિલ્લામાં વર્તમાન ચોમાસા દરમિયાન થયેલા ઓછા વરસાદની પરિસ્થિતિને ધ્યાનમાં રાખીને, નાગરિકોને પીવાના તેમજ સિંચાઈના પાણીની કોઈ મુશ્કેલી ન પડે તે માટે આ બેઠકનું આયોજન કરવામાં આવ્યું હતું.

મંત્રીએ મહાનગરપાલિકા, સિંચાઈ વિભાગ અને પાણી પુરવઠા વિભાગના ઉચ્ચ અધિકારીઓ સાથે પાણી વિતરણની આનુસંગિક વ્યવસ્થાઓ અંગે વિસ્તૃત સમીક્ષા કરી હતી અને વર્તમાન પરિસ્થિતિ અંગે જરૂરી માહિતી મેળવી હતી. બેઠક દરમિયાન નાગરિકોને સરળતાથી અને પુરતા પ્રમાણમાં પાણી ઉપલબ્ધ થાય તે માટે આગોતરા આયોજન અને લેવાના થતા વિવિધ પગલાંઓ અંગે અધિકારીઓ સાથે સઘન ચર્ચા-વિચારણા કરવામાં આવી હતી.આ સમીક્ષા બેઠકમાં ધારાસભ્ય દિવ્યેશ અકબરી, મેયર મોનિકાબેન વ્યાસ, સ્ટેન્ડિંગ કમિટીના ચેરમેન ધીરેન મોનાણી, મ્યુનિસિપલ કમિશનર દીપેશ કેડીયા, શાસક પક્ષના નેતા  અમર મોદી તેમજ દંડક પ્રવિણાબેન રૂપડીયા ઉપસ્થિત રહ્યા હતા. આ ઉપરાંત પાણી પુરવઠા અને સિંચાઈ વિભાગના ઉચ્ચ અધિકારીઓએ હાજર રહી જરૂરી વિગતો રજૂ કરી હતી.