ભાવનગરની શાંતિલાલ શાહ એન્જિનિયરિંગ કોલેજના ત્રણ વિદ્યાર્થીઓની ગૂગલ સ્ટુડન્ટ લીડ તરીકે પસંદગી

ભાવનગરની શાંતિલાલ શાહ એન્જિનિયરિંગ કોલેજના ત્રણ વિદ્યાર્થીઓની ગૂગલ સ્ટુડન્ટ લીડ તરીકે પસંદગી

ટેકનોલોજીના ક્ષેત્રે ભાવનગરની શાંતિલાલ શાહ એન્જિનિયરિંગ કોલેજે એક મોટી સિદ્ધિ હાંસલ કરી છે. આ કોલેજના આઈ.ટી. વિભાગના ત્રણ વિદ્યાર્થીઓ — બ્રિન્દા ગોહેલ, શિવમ પટેલ, અને માહિત માવાણી — ની ગૂગલના પ્રતિષ્ઠિત કાર્યક્રમ Google Developer Student Clubs (GDSC) અંતર્ગત સ્ટુડન્ટ લીડ તરીકે પસંદગી થઈ છે.

કોલેજના આચાર્ય ડૉ. જી.પી. વડોદરિયા અને આઈ.ટી. વિભાગના વડા ડૉ. ડી.જે. વરિયાના માર્ગદર્શન હેઠળ આ વિદ્યાર્થીઓએ આંતરરાષ્ટ્રીય પ્લેટફોર્મ પર કોલેજ અને ભાવનગરનું નામ રોશન કર્યું છે.

GDSC પ્રોગ્રામ અને તેની ભૂમિકા

GDSC એ ગૂગલ ડેવલપર્સ દ્વારા સંચાલિત એક વૈશ્વિક પ્લેટફોર્મ છે. તેનો મુખ્ય ઉદ્દેશ્ય કોલેજના વિદ્યાર્થીઓને ટેકનોલોજીના ક્ષેત્રે તાલીમ આપવી, વાસ્તવિક જીવનની સમસ્યાઓનું નિરાકરણ લાવવું અને તેમને ટેકનોલોજી સમુદાય સાથે જોડવાનું છે. આ પદવી મળવાથી વિદ્યાર્થીઓને ગૂગલની વર્ચ્યુઅલ અને ઇન-પર્સન ઇવેન્ટ્સમાં ભાગ લેવાની તક મળશે, આંતરરાષ્ટ્રીય સ્તરના મેન્ટરો પાસેથી તાલીમ મેળવી શકાશે, તેમની લીડરશીપ ક્ષમતાઓમાં વિકાસ થશે.

આ પ્રોગ્રામનો હેતુ વિદ્યાર્થીઓ પોતે ટેકનોલોજી શીખે અને પોતાના જેવા અન્ય યુવાનોને પણ શીખવે તે છે. આ સિદ્ધિથી આઈ.ટી. ક્ષેત્રમાં જ્ઞાન પ્રાપ્ત કરવા અને વૈશ્વિક સ્તરે કામ કરવાની અનોખી તક મળશે. આ ત્રણેય વિદ્યાર્થીઓની પસંદગીથી શાંતિલાલ શાહ એન્જિનિયરિંગ કોલેજ અને સમગ્ર ભાવનગરનું ગૌરવ વધ્યું છે.