મહેસાણાના સુણક ગામે 77મા તાલુકા કક્ષાના વન મહોત્સવ-2026ની શાનદાર ઉજવણી

મહેસાણાના સુણક ગામે 77મા તાલુકા કક્ષાના વન મહોત્સવ-2026ની શાનદાર ઉજવણી: ‘વનકવચ’નું લોકાર્પણ

મહેસાણા જિલ્લાના ઊંઝા તાલુકાના સુણક ગામે 77મા તાલુકા કક્ષાના વન મહોત્સવ-2026ની ખૂબ જ ઉત્સાહભેર અને શાનદાર ઉજવણી કરવામાં આવી હતી. પર્યાવરણના જતન અને હરિયાળી વધારવાના ઉદ્દેશ્ય સાથે યોજાયેલા આ કાર્યમમાં અનેક મહાનુભાવો ઉપસ્થિત રહ્યા હતા.

નવનિર્મિત ‘વનકવચ’નું લોકાર્પણ અને વૃક્ષારોપણ:

આ કાર્યક્રમ લોકસભા સાંસદ હરિભાઈ પટેલ અને ઊંઝાના ધારાસભ્ય કિરીટભાઈ પટેલની વિશેષ ઉપસ્થિતિમાં સંપન્ન થયો હતો. પર્યાવરણ અને વન સંવર્ધનને વેગ આપવા માટે સુણક ગામે નવનિર્મિત ‘વનકવચ’નું લોકાર્પણ કરવામાં આવ્યું હતું. આ પ્રસંગે ઉપસ્થિત તમામ મહાનુભાવોના હસ્તે વૃક્ષારોપણ કરવામાં આવ્યું હતું અને પર્યાવરણને બચાવવાનો સંદેશ આપવામાં આવ્યો હતો.

‘વૃક્ષ રથ’ને પ્રસ્થાન કરાવાયું:
વન મહોત્સવના પ્રચાર અને પ્રસાર દ્વારા જનજાગૃતિ ફેલાવવા માટે વિશેષરૂપે તૈયાર કરવામાં આવેલા ‘વૃક્ષ રથ’ને તમામ અતિથિઓએ લીલી ઝંડી બતાવીને પ્રસ્થાન કરાવ્યું હતું. આ રથ દ્વારા ગ્રામ્ય વિસ્તારોમાં ફરીને લોકો સુધી હરિયાળી ક્રાંતિ અને પ્રકૃતિ પ્રેમનો સંદેશ પહોંચાડવામાં આવશે.

આ કાર્યક્રમે સ્થાનિક નાગરિકો અને ગ્રામજનોમાં પર્યાવરણ રક્ષણ પ્રત્યેનો ઉત્સાહ વધારવાનું એક ઉત્તમ ઉદાહરણ પૂરું પાડ્યું છે.