મોરબી મહાનગરપાલિકાની સ્ટેન્ડિંગ કમિટીની બેઠકમાં લેવાયો મહત્વપૂર્ણ નિર્ણય

મોરબી મહાનગરપાલિકાની સ્ટેન્ડિંગ કમિટીની બેઠકમાં લેવાયો મહત્વપૂર્ણ નિર્ણય: કચરામાંથી ગેસ બનાવવા માટે સ્ટેટ ઓફ ધ આર્ટ પ્લાન્ટ સ્થાપવા અંગે મહત્વનો નિર્ણય

મોરબી મહાનગરપાલિકા ખાતે સ્ટેન્ડિંગ કમિટીની બેઠક યોજાઈ હતી, જેમાં શહેરના સર્વાંગી વિકાસકામો અને આગામી તહેવારોને ધ્યાનમાં રાખીને લાઇટ-રોશની અંગે મહત્વના નિર્ણયો લેવામાં આવ્યા છે. આ બેઠકમાં સૌથી મોટો નીતિવિષયક નિર્ણય કચરામાંથી ગેસ બનાવવા માટેનો 'સ્ટેટ ઓફ ધ આર્ટ મોર્ડન ટેક્નોલોજી' સભર પ્લાન્ટ સ્થાપવા અંગે લેવાયો છે.

રાજ્યની પ્રથમ મહાનગરપાલિકા બનવાનું ગૌરવ
જો આ મહત્વકાંક્ષી પ્રોજેક્ટ સફળતાપૂર્વક સાકાર થશે, તો આ પ્રકારની અત્યાધુનિક ટેક્નોલોજી ધરાવતો પ્લાન્ટ શરૂ કરનાર મોરબી ગુજરાત રાજ્યની પ્રથમ મહાનગરપાલિકા બનવાનું ગૌરવ મેળવશે. આનાથી શહેરમાં કચરાના નિકાલની સમસ્યા હલ થવાની સાથેસાથે પર્યાવરણને પણ મોટો ફાયદો થશે.

સ્ટેન્ડિંગ કમિટીના ચેરમેને આ અંગે માહિતી આપતા જણાવ્યું હતું કે, આ પ્લાન્ટના ટેકનિકલ ડેમોન્સ્ટ્રેશન અને અન્ય તમામ બાબતો પર આગામી બેઠકમાં ગહન વિચાર-વિમર્શ કરવામાં આવશે, ત્યારબાદ તેના પર અંતિમ નિર્ણય લેવામાં આવશે. આ બેઠકમાં આગામી તહેવારો દરમિયાન શહેરમાં દીવાલો અને માર્ગો પર આકર્ષક લાઇટ-રોશની કરવા અંગે પણ ચર્ચા થઈ હતી.