સાબરકાંઠામાં આ વર્ષે ઓર્ગેનિક બટાકાનું વાવેતર કરનાર ખેડૂતો વધ્યા, સારા ભાવ પણ મળ્યા

સાબરકાંઠા જીલ્લામાં ગત વર્ષે બટાકાના ભાવમાં કડાકો બોલી ગયા બાદ ચાલુ વર્ષે ડબલ ભાવ સાથે લેવાલી વધતાં બટાકાના વાવેતર કરનાર ખેડૂતોમાં સિઝનના પ્રારંભના તબક્કામાં ખેડૂતોમાં આનંદનું મોજુ ફરી વળ્યુ છે તેમાંય ઓર્ગેનીક બટાકાના વાવેતર કરનાર ખેડૂતોમાં પણ વધારો થયો છે.

ગત વર્ષે ખેડૂતોને બટાકાના પ્રતિ મણે રુ.60 થી 125 મળતા હતા જ્યારે ચાલુ વર્ષે રુ.190 થી 235 નો ભાવ મળી રહ્યો છે. ઓર્ગેનીક બટાકાનું વાવેતર કરનાર કલોલ કંપાના ખેડૂત પ્રવિણભાઈ પટેલ છેલ્લા પાંચ વર્ષથી ઓર્ગેનીક બટાકાના ઉત્પાદન કરે છે. તેમણે જણાવ્યુ હતુ કે, સુભાષ પાલેકરની શિબિરની પ્રેરણા લઈને ગૌમૂત્ર, ગોબર, છાશ, ગોળ વગેરે મિક્સ કરીને પ્રવાહી બનાવીને તેને બટાકાના વાવેતરમાં છંટકાવ વર્ષે છે અને આ બટાકાનું શાક પણ બનાવી શકાય છે અને એક માસ સુધી બટાકાનો ઉપયોગ ના કરો તો પણ તે બટાકા બગડતા નથી. સાબરકાંઠા જીલ્લામાં આ વર્ષે ખેડૂતોએ 22587 હેકટરમાં બટાકાનું વિપુલ પ્રમાણમાં ઉત્પાદન થતાં પ્રતિ વીઘાએ રુ.10 થી 15 હજારનો ફાયદો થતાં ખેડૂતો ખુશખુશાલ છે.