પ્રધાનમંત્રી નરેન્દ્ર મોદીએ ચીન ખાતે SCO સમિટમાં ચીનના રાષ્ટ્રપતિ શી જિનપિંગ સાથે દ્વિપક્ષીય ચર્ચા કરી

પ્રધાનમંત્રી નરેન્દ્ર મોદીએ રવિવારે તિયાનજિનમાં યોજાયેલી શાંઘાઈ કોઓપરેશન ઓર્ગેનાઈઝેશન (SCO)સમિટમાં ચીનના રાષ્ટ્રપતિ શી જિનપિંગ સાથે દ્વિપક્ષીય ચર્ચા કરી. આ બેઠકમાં બંને નેતાઓએ પરસ્પર આદર, પરસ્પર હિત અને પરસ્પર સંવેદનશીલતાના આધાર પર ભારત-ચીન સંબંધોને આગળ વધારવા પ્રતિબદ્ધતા પુનરાવર્તિત કરી.

ઓક્ટોબર 2024માં કાઝાનમાં થયેલી તેમની છેલ્લી મુલાકાત બાદ સર્જાયેલા સકારાત્મક ગતિને આવકારતા, મોદીએ અને શીએ ભાર મૂક્યો કે ભારત અને ચીન “વિકાસના ભાગીદાર છે, પ્રતિસ્પર્ધી નહીં” અને તેમના મતભેદોને વિવાદમાં ફેરવવા દેવા ન જોઈએ. સરહદ પર શાંતિ અને સ્થિરતાની મહત્વતા દર્શાવતા બંને નેતાઓએ ગયા વર્ષે થયેલી સફળ ડિસએન્ગેજમેન્ટ તથા ત્યારથી જાળવાયેલા શાંતિપૂર્ણ વાતાવરણ અંગે સંતોષ વ્યક્ત કર્યો. બંને નેતાઓએ સરહદી મુદ્દાના ન્યાયસંગત, તર્કસંગત અને પરસ્પર સ્વીકાર્ય ઉકેલ માટે સમર્થન પુનરાવર્તિત કર્યું અને તાજેતરની વિશેષ પ્રતિનિધિઓની ચર્ચામાં થયેલી પ્રગતિને માન્યતા આપી.

માનવ-થી-માનવ સંબંધોને પ્રોત્સાહન આપવા, બંને પક્ષોએ વધુ ડાયરેક્ટ ફ્લાઇટ, સરળ વિઝા સુવિધા અને સાંસ્કૃતિક પહેલ દ્વારા કનેક્ટિવિટી મજબૂત બનાવવા સહમત થયા, તેમજ કૈલાસ-માનસરોવર યાત્રાના પુનઃપ્રારંભને આધારે આગળ વધવાનો સંકલ્પ કર્યો. વેપાર અને રોકાણમાં વધારો કરવા તેમજ વેપાર અસંતુલન દૂર કરવા મુદ્દે પણ ચર્ચા થઈ, અને બંને અર્થતંત્રોની વૈશ્વિક વેપાર સ્થિરતા માટેની ભૂમિકા સ્વીકારી.

પ્રધાનમંત્રી નરેન્દ્ર મોદીએ ભાર મૂક્યો કે ભારત અને ચીન બંને વ્યૂહાત્મક સ્વાયત્તતા ધરાવે છે અને તેમના સંબંધોને ત્રીજા દેશના દ્રષ્ટિકોણથી ન જોવાં જોઈએ. ચર્ચામાં આતંકવાદ જેવા પ્રાદેશિક અને વૈશ્વિક પડકારો સામે સહકાર તેમજ બહુપક્ષીય વેપાર મંચોમાં ન્યાયસંગતતા સુનિશ્ચિત કરવાના મુદ્દા પણ ઉઠાવાયા.

મોદીએ ચીનની SCO અધ્યક્ષતા અને તિયાનજિન સમિટ માટે ભારતનું સમર્થન વ્યક્ત કર્યું અને 2026માં ભારત ખાતે યોજાનારી BRICS સમિટમાં હાજરી આપવા શી જિનપિંગને આમંત્રણ આપ્યું. શીએ આ આમંત્રણ માટે આભાર વ્યક્ત કર્યો અને ભારતની BRICS અધ્યક્ષતા માટે સહયોગ આપવાનો સંકલ્પ વ્યક્ત કર્યો.

તેથી પ્રધાનમંત્રીએ ચીનની કોમ્યુનિસ્ટ પાર્ટીના પોલિટબ્યુરોના સ્ટેન્ડિંગ કમિટીના સભ્ય કાઈ ચી સાથે પણ મુલાકાત કરી.