પ્રધાનમંત્રી નરેન્દ્ર મોદી ઉઝબેકિસ્તાનના સર્વોચ્ચ રાજકીય પુરસ્કારથી સન્માનિત

ઉઝબેકિસ્તાનના રાષ્ટ્રપતિ શાવકત મિર્ઝિયોયેવે, રવિવારે પ્રધાનમંત્રી નરેન્દ્ર મોદીને દેશના સર્વોચ્ચ રાજકીય પુરસ્કાર ‘ઓલિય દરાજાલી દોસ્તલિક’(સર્વોચ્ચ મૈત્રી સન્માન) થી સન્માનિત કર્યા.

આ પ્રસંગે પ્રધાનમંત્રીએ કહ્યું કે, ઉઝબેકિસ્તાનનું સર્વોચ્ચ સન્માન મેળવવું તેમના માટે ખૂબ જ ગર્વની ક્ષણ છે. તેમણે કહ્યું, “આ સન્માન 140 કરોડ ભારતવાસીઓનું સન્માન છે અને હું તમામ ભારતવાસીઓ વતી ઉઝબેકિસ્તાનના લોકોનો, અહીંની સરકારનો અને મારા મિત્ર આદરણીય રાષ્ટ્રપતિજીનો હૃદયપૂર્વક આભાર વ્યક્ત કરું છું.”

પ્રધાનમંત્રીએ આ સન્માનને મોટી જવાબદારી ગણાવતા કહ્યું કે, ભારત પોતાની જવાબદારીઓથી ક્યારેય પાછળ નહીં હટે અને આ મિત્રતાને સંપૂર્ણપણે નિભાવશે. તેમણે કહ્યું કે, બંને દેશો મળીને વૈશ્વિક દક્ષિણનો સંયુક્ત અવાજ બનશે અને તેના કલ્યાણ તથા સમગ્ર માનવતાના હિતમાં સમર્પણ સાથે કામ કરશે.

પ્રધાનમંત્રીએ આ સન્માનને બંને દેશોની સદીઓ જૂની મિત્રતા અને સહિયારી વિરાસતને સમર્પિત કરતા કહ્યું કે, ઉઝબેકિસ્તાનના રાષ્ટ્રપતિના દૂરંદેશી નેતૃત્વ અને ભારત પ્રત્યેની તેમની મિત્રતાથી દ્વિપક્ષીય સંબંધો સતત મજબૂત થયા છે. તેમણે કહ્યું કે, આનું જ પરિણામ છે કે આજે બંને દેશોના સંબંધોને વ્યાપક વ્યૂહાત્મક ભાગીદારીનું નવું સ્તર મળ્યું છે.

આ પહેલાં ઉઝબેકિસ્તાનના રાષ્ટ્રપતિએ પ્રધાનમંત્રીનો મુક્તમને અને ભાઈચારા સાથે થયેલી સાર્થક ચર્ચાઓ માટે આભાર માન્યો. તેમણે ભારતની તીવ્ર પ્રગતિ અને વૈશ્વિક મંચ પર વધતા પ્રભાવની પ્રશંસા કરતા તેને વડાપ્રધાન મોદીના નેતૃત્વ સાથે જોડ્યું. તેમણે કહ્યું કે, બંને દેશોના સંબંધો ઐતિહાસિક રીતે નવા સ્તરે પહોંચ્યા છે. વેપાર, રોકાણ, પરિવહન, પર્યટન, સંસ્કૃતિ અને પર્યાવરણ સહિત વિવિધ ક્ષેત્રોમાં સહયોગ મજબૂત થયો છે.

રાષ્ટ્રપતિએ કહ્યું કે, બંને દેશોમાં અપાર સંભાવનાઓ છે અને 1 અબજ ડોલરનો વર્તમાન વેપાર લક્ષ્ય નથી, પરંતુ શરૂઆત છે. તેમણે ભવિષ્યમાં વેપારને 5 અબજ ડોલર અને આગળ 10 અબજ ડોલર સુધી લઈ જવાની આકાંક્ષા વ્યક્ત કરી.