ભારત અને બ્રિટેને તમામ પ્રકારના આતંકવાદની કરી આકરી નિંદા

આતંકવાદનો સામનો કરવા પર ભારત-યુકે સંયુક્ત કાર્યકારી જૂથની 16મી બેઠક 2023માં ભારતમાં યોજાશે

ભારત અને બ્રિટેને તમામ પ્રકારના આતંકવાદની નિંદા કરી છે તેમજ આતંકવાદના વૈશ્વિક જોખમનો વ્યાપકપણે સામનો કરવા માટે આંતરરાષ્ટ્રીય સહયોગને મજબૂત કરવાની જરૂરિયાત પર ભાર મૂક્યો છે. ચોથી અને પાંચમી એપ્રિલના રોજ લંડનમાં આતંકવાદ વિરોધી સંયુક્ત કાર્યકારી જૂથની પંદરમી બેઠકમાં આ અંગે સહમતિ બની હતી. ભારતીય પ્રતિનિધિમંડળનું નેતૃત્વ વિદેશ મંત્રાલયમાં આતંકવાદ વિરોધી વિભાગના સંયુક્ત સચિવ મહાવીર સિંઘવીએ કર્યું હતું, જ્યારે યુકેના પ્રતિનિધિમંડળનું નેતૃત્વ આંતરિક સુરક્ષાના મહાનિર્દેશક ક્લો સ્ક્વાયરે કર્યું હતું. 

બંને પક્ષોએ પોતાના પ્રદેશો અને પ્રદેશોમાં ઉગ્રવાદી ધમકીઓ પર તેમના વિચારો વ્યક્ત કાર્ય હતા. જેમાં વૈશ્વિક સ્તરે ઓળખાયેલી આતંકવાદી સંસ્થાઓ અને વ્યક્તિઓ દ્વારા ઉભા કરવામાં આવેલા જોખમો સહિત તમામ આતંકવાદી નેટવર્ક્સ સામે નક્કર કાર્યવાહીની જરૂરિયાત પર ભાર મૂક્યો હતો. બંને પક્ષોએ આતંકવાદી વ્યક્તિઓ અને સંસ્થાઓ પરના પ્રતિબંધો તેમજ આતંકવાદ સામે લડવા માટે બહુપક્ષીય મંચો પર સાથે મળીને કામ કરવા પર પણ વિચારોનું આદાન-પ્રદાન કર્યું. આતંકવાદનો સામનો કરવા પર ભારત-યુકે સંયુક્ત કાર્યકારી જૂથની 16મી બેઠક 2023માં ભારતમાં યોજાશે.