હોર્મુઝ સ્ટ્રેટમાં વધતા તણાવને લઈને યુએન વડા ચિંતિત, તમામ પક્ષોને વાતચીતના માધ્યમથી ઉકેલ લાવવા અપીલ

સંયુક્ત રાષ્ટ્ર (યુએન)ના મહાસચિવ એન્ટોનિયો ગુટેરેસ હોર્મુઝ સ્ટ્રેટને લઈને તાજેતરમાં વધેલા તણાવને લઈને ઊંડી ચિંતામાં છે. પ્રવક્તા સ્ટેફન દુજારિકે બુધવારે(9 સપ્ટેમ્બર) જણાવ્યું હતું કે, "મહાસચિવ છેલ્લા કેટલાક દિવસોમાં હોર્મુઝ સ્ટ્રેટ અને તેની આસપાસની પરિસ્થિતિ વધુ બગડવાના અહેવાલોથી અત્યંત ચિંતિત છે. જેમાં વેપારી જહાજો પર થયેલા હુમલાઓ અને દરિયાઈ તથા ઊર્જા માળખાકીય સુવિધાઓ સામે આગળ વધુ કાર્યવાહી કરવાની ધમકીઓ સામેલ છે."

તેમણે કહ્યું કે હોર્મુઝ સ્ટ્રેટ અને તેની આસપાસના તમામ દેશોના જહાજોના આવન-જાવનના અધિકાર અને દરિયાઈ આવાગમનની સ્વતંત્રતાને આંતરરાષ્ટ્રીય કાયદા મુજબ સંપૂર્ણપણે પુનઃસ્થાપિત કરવી જોઈએ અને તેનું સન્માન કરવું જોઈએ. સંયુક્ત રાષ્ટ્ર મહાસચિવની તે અપીલનું પુનરાવર્તન કરે છે જેમાં તેમણે તમામ પક્ષોને મહત્તમ સંયમ રાખવા અને એવા પગલાં કે નિવેદનોથી બચવા જણાવ્યું હતું જે પહેલેથી જ તણાવપૂર્ણ સ્થિતિને વધુ ભડકાવી શકે છે.

તેમને ચેતવણી આપી કે પરિસ્થિતિ વધુ બગડવા પર સામાન્ય લોકો, પ્રાદેશિક સ્થિરતા, આંતરરાષ્ટ્રીય શાંતિ અને સુરક્ષાની સાથે-સાથે વૈશ્વિક અર્થતંત્ર પર પણ ગંભીર અસર પડી શકે છે. સમાચાર એજન્સી સિન્હુઆના જણાવ્યા અનુસાર, પ્રવક્તાએ કહ્યું કે ગુટેરેસે તમામ પક્ષોને અપીલ કરી છે કે તેઓ રાજદ્વારી માધ્યમોનો પૂરેપૂરો ઉપયોગ કરે અને વાતચીત દ્વારા વિવાદોનો ઉકેલ લાવે. સંયુક્ત રાષ્ટ્ર સચિવાલય તણાવ ઓછો કરવા અને કાયમી ઉકેલ લાવવા માટે કરવામાં આવતા તમામ વિશ્વાસપાત્ર પ્રયાસોમાં સહયોગ આપવા માટે તૈયાર છે.

આ દરમિયાન, ઈરાનની ઈસ્લામિક રેવોલ્યુશન ગાર્ડ કોર્પ્સ (IRGC)ની નૌકાદળે મંગળવારે દાવો કર્યો કે તેણે તે જ દિવસે હોર્મુઝ સ્ટ્રેટના પ્રવેશ ક્ષેત્રમાં યુએસ સૈન્યની સૌથી આધુનિક અને સ્માર્ટ માનવરહિત સબમરીનમાંથી એકને પોતાના કબજામાં લઈ લીધી છે.

IRGCની સત્તાવાર સમાચાર એજન્સી 'સેપાહ ન્યૂઝ' પર જારી નિવેદનમાં કહેવામાં આવ્યું કે આ માનવરહિત પાણીની અંદર ચાલતા વાહનને એક જટિલ ગુપ્તચર અને અભિયાન સંબંધી કાર્યવાહી દરમિયાન પકડવામાં આવ્યું. આ વાહનની ઓળખ 'ડાઈવ-એલડી' તરીકે થઈ છે અને તેમાં દુનિયાની સૌથી આધુનિક પાણીની નીચે ચાલતી ટેકનોલોજી લાગેલી છે. IRGC એ કહ્યું કે તેના ફોટા પણ જલ્દી જારી કરવામાં આવશે. સેપાહ ન્યૂઝના જણાવ્યા અનુસાર, IRGC એ મંગળવારે એક અલગ નિવેદનમાં એવો પણ દાવો કર્યો કે તેની વાયુ રક્ષા પ્રણાલીએ હોર્મુઝ સ્ટ્રેટની ઉપર ઉડી રહેલા MQ-9 રીપીટર ડ્રોનને તોડી પાડ્યું છે.

IRGCના આ દાવાઓ પછી યુએસ સૈન્યએ એક નિવેદન જારી કરીને કહ્યું કે તેનું પાણીની અંદર કામ કરનારું એક ડ્રોન પ્રાદેશિક દરિયાઈ વિસ્તારોના સર્વેક્ષણ દરમિયાન એક દિવસ પહેલા તકનીકી ખામીનો શિકાર બન્યું હતું, જોકે અમેરિકાએ એ નથી જણાવ્યું કે તે સાધનને ઈરાને પોતાના કબજામાં લીધું છે કે નહીં.