ઉત્તરાખંડ વિધાનસભામાં આજે યુનિફોર્મ સિવિલ કોડ બિલ રજૂ થશે

UCC સાથે જોડાયેલું વિધેયક રજૂ કરનાર ઉત્તરાખંડ પહેલું રાજ્ય બનશે

ઉત્તરાખંડ વિધાનસભામાં આજે સમાન નાગરિક સંહિતા સંબંધિત બિલ ગૃહમાં રજૂ કરાશે. આ દરમિયાન ગઈકાલે મળેલી વિધાનસભાની કામકાજ સલાહકાર સમિતિની બેઠકમાં દેશ અને રાજ્ય માટેના આ મહત્ત્વના વિધેયકને ધ્યાનમાં રાખીને આજે પ્રશ્નકાળ અને શૂન્યકાળ મોકૂફ રાખવાનો નિર્ણય લેવાયો છે.

આ સાથે રાજ્યના આંદોલનકારીઓને સરકારી સેવાઓમાં દસ ટકા અનામત આપવા અંગેનો અહેવાલ પણ ગૃહમાં રજૂ કરાશે. સમાન નાગરિક સંહિતા લાગુ કરવા માટે મુખ્યમંત્રી પુષ્કરસિંહ ધામીએ જસ્ટિસ રંજના પ્રકાશ દેસાઈની અધ્યક્ષતામાં પાંચ સભ્યોની સમિતિની રચના કરી હતી. જે બાદ 2 ફેબ્રુઆરીએ યુનિફોર્મ સિવિલ કોડનો ડ્રાફ્ટ મુખ્યમંત્રી પુષ્કર સિંહ ધામીને સોંપવામાં આવ્યો હતો. 

ઉત્તરાખંડ સરકારે મે 2022માં સુપ્રીમ કોર્ટના નિવૃત્ત ન્યાયાધીશના નેતૃત્વમાં નિષ્ણાતોની એક સમિતિની રચના કરી હતી. સરકાર દ્વારા 27 મે 2022 ના રોજ એક સૂચના જારી કરવામાં આવી હતી અને શરતો 10 જૂન 2022 ના રોજ સૂચિત કરવામાં આવી હતી. સમિતિએ બેઠકો, પરામર્શ, ક્ષેત્રની મુલાકાતો અને નિષ્ણાતો અને જનતા સાથેની વાતચીત બાદ ડ્રાફ્ટ તૈયાર કર્યો હતો. આ પ્રક્રિયામાં 13 મહિનાથી વધુ સમય લાગ્યો હતો.