તેલંગાણા: વિવિધ પક્ષોના ટોચના નેતાઓ પક્ષના ઉમેદવારોના સમર્થનમાં રાજ્યના ખૂણે ખૂણે કરી રહ્યા છે પ્રવાસ

શાસક BRSના વડા ચંદ્રશેખર રાવે ગઈકાલે તેમના પ્રથમ સ્તરના ચૂંટણી પ્રચારનું સમાપન કર્યું અને 40 થી વધુ મતવિસ્તારોમાં રેલીઓને સંબોધિત કરી. 

તેલંગાણામાં વિધાનસભાની ચૂંટણીમાં ભાજપ, શાસક ભારતીય રાષ્ટ્ર સમિતિ અને કોંગ્રેસ વચ્ચે ત્રિકોણીય મુકાબલો થવાની સંભાવના છે, જ્યારે મતવિસ્તારોમાં બહુકોણીય હરીફાઈની અપેક્ષા છે. મુખ્ય રાજકીય પક્ષોએ આવતીકાલે બાકીની બેઠકો માટે તેમની અંતિમ યાદીમાં ઉમેદવારોના નામ જાહેર કર્યા છે. કારણ કે આજે નામાંકન ભરવાનો છેલ્લો દિવસ છે. દરમિયાન ગઈકાલે રાજ્યની તમામ 119 બેઠકો પર 1129 ઉમેદવારીપત્રો ભરાયા હતા.

દરમિયાન, ચૂંટણી પ્રચાર આગલા સ્તરે પહોંચી ગયો છે અને વિવિધ પક્ષોના ઘણા ટોચના નેતાઓ તેમના ઉમેદવારોના સમર્થનમાં રાજ્યના ખૂણે-ખૂણે પ્રવાસ કરી રહ્યા છે.

કેન્દ્રીય મંત્રીઓ સહિત ભાજપના વરિષ્ઠ નેતાઓ તેમની પાર્ટીના ઉમેદવારોના સમર્થનમાં પ્રચાર કરવા માટે આગામી થોડા દિવસો માટે રાજ્યમાં રહેશે. પ્રધાનમંત્રી નરેન્દ્ર મોદી આવતીકાલે સિકંદરાબાદમાં બીજી જાહેરસભાને સંબોધશે. 

કેન્દ્રીય માહિતી અને પ્રસારણ મંત્રી અનુરાગસિંહ ઠાકુર ગઈકાલે મુનુગોનમાં ભાજપના ઉમેદવાર ક્રિષ્નારેડ્ડી સાથે હતા. તેઓ આજે જાનગાંવમાં પ્રચાર કરશે. શાસક BRSના વડા ચંદ્રશેખર રાવે ગઈકાલે તેમના પ્રથમ સ્તરના ચૂંટણી પ્રચારનું સમાપન કર્યું અને 40 થી વધુ મતવિસ્તારોમાં રેલીઓને સંબોધિત કરી. 

તેઓ આગામી સોમવારથી પ્રચારનો આગલો રાઉન્ડ શરૂ કરશે જેમાં તેઓ લગભગ 50 મતવિસ્તારોને આવરી લે તેવી શક્યતા છે. દરમિયાન, કોંગ્રેસે તેનો લઘુમતી ઢંઢેરો બહાર પાડ્યો જેમાં રાષ્ટ્રીય પક્ષ સત્તામાં આવે તો લઘુમતીઓને ઘણી છૂટછાટો આપે છે. કોંગ્રેસના સ્ટાર પ્રચારકો પણ દિવાળી પછી બીજા રાઉન્ડ માટે પ્રચાર કરશે.