દિલ્હી હાઈકોર્ટે સોનમ વાંગચુકને ખાનગી હોસ્પિટલમાં ખસેડવાની આપી મંજૂરી

સામાજિક કાર્યકર્તા સોનમ વાંગચુકની પત્ની ગીતાંજલિ અંગમોની અરજી પર મંગળવારે(21 જુલાઈ) દિલ્હી હાઈકોર્ટમાં સુનાવણી થઈ હતી. આ અરજી સિંગલ જજ સામેના આદેશ વિરુદ્ધ દાખલ કરવામાં આવી હતી, જેમાં સોનમ વાંગચુકને તેમની પસંદગીની ખાનગી હોસ્પિટલમાં ખસેડવા સંબંધી વચગાળાની રાહત આપવાનો ઇનકાર કરવામાં આવ્યો હતો.

સુનાવણી દરમિયાન કેન્દ્ર સરકાર વતી રજૂ થયેલા વધારાના સોલિસિટર જનરલ (એએસજી)એ કોર્ટને જણાવ્યું હતું કે, કોર્ટની અગાઉની સૂચનાઓ મુજબ એઈમ્સના ડૉક્ટરો સતત વાંગચુકની દેખરેખ રાખી રહ્યા છે અને તેમની તબીબી સ્થિતિ પર નજર રાખી રહ્યા છે.

બીજી બાજુ, ગીતાંજલિ અંગમોએ અદાલતમાં એક સોગંદનામું દાખલ કર્યું, જેમાં સોનમ વાંગચુકનો મેડિકલ રિપોર્ટ અને ડૉક્ટરોની સલાહ રેકોર્ડ પર રાખવામાં આવી. તેમના વકીલે તે ડૉક્ટરોનો પત્ર પણ અદાલતમાં રજૂ કર્યો, જેઓ લાંબા સમયથી વાંગચુકની સારવાર અને તબીબી સલાહ આપી રહ્યા છે. આ સાથે જ તે ડૉક્ટરનો પત્ર પણ જમા કરવામાં આવ્યો, જેઓ તેમના વિરોધ પ્રદર્શન દરમિયાન તેમની સારવાર કરી રહ્યા હતા.

ગીતાંજલિ અંગમોના વકીલે અદાલતમાં જણાવ્યું કે સંબંધિત ડૉક્ટરોએ વાંગચુકની પ્રત્યક્ષ ક્લિનિકલ તપાસ કરી નથી, પરંતુ તેમણે ઉપલબ્ધ મેડિકલ રિપોર્ટ અને તેમની સંપૂર્ણ મેડિકલ હિસ્ટ્રીના આધારે પોતાનો વ્યાવસાયિક અભિપ્રાય આપ્યો છે.

સુનાવણી દરમિયાન એએસજીએ કોર્ટમાં જણાવ્યું કે સૌથી મોટી ચિંતા વાંગચુકના મેડિકલ રિપોર્ટમાં ટીએલસી 2.9 હોવાની છે. તેમણે કહ્યું કે આ સ્થિતિ અત્યંત ગંભીર છે અને તેનાથી શોક, સંક્રમણ તેમજ મલ્ટીપલ ઓર્ગન ફેઈલિયરનું જોખમ ઊભું થઈ શકે છે.

ઉલ્લેખનીય છે કે ટીએલસીનો અર્થ ટોટલ લ્યુકોસાઈટ કાઉન્ટ થાય છે. તે શરીરમાં શ્વેત રક્તકણો (ડબ્લ્યુબીસી)ની કુલ સંખ્યા માપે છે જે સંક્રમણ અને બિમારીઓ સામે લડવામાં મદદ કરે છે.

બધા પક્ષોની દલીલો સાંભળ્યા પછી દિલ્હી હાઈકોર્ટના મુખ્ય ન્યાયાધીશે કહ્યું કે સોનમ વાંગચુકને મેદાંતા હોસ્પિટલમાં ખસેડવામાં આવે. અદાલતે નિર્દેશ આપ્યો કે અત્યાર સુધીના તમામ મેડિકલ તપાસ રિપોર્ટ મેદાંતા હોસ્પિટલના ડૉક્ટરોના પેનલને ઉપલબ્ધ કરાવવામાં આવે. સાથે જ મેદાંતા હોસ્પિટલને વાંગચુકની સારવાર માટે વિશેષજ્ઞ ડૉક્ટરોનું એક પેનલ રચવાનો પણ નિર્દેશ આપવામાં આવ્યો.

સુનાવણી દરમિયાન સોલિસિટર જનરલ તુષાર મહેતાએ કહ્યું હતું કે સરકારને સોનમ વાંગચુકને મેદાંતા હોસ્પિટલ મોકલવા સામે કોઈ વાંધો નથી. જોકે, તેમણે આગ્રહ કર્યો કે અદાલત પોતાના આદેશમાં એ પણ સ્પષ્ટ કરે કે મેદાંતાના ડૉક્ટરોની મંજૂરી વગર સોનમ વાંગચુકને હોસ્પિટલમાંથી ડિસ્ચાર્જ કરવામાં આવશે નહીં.

તુષાર મહેતાએ એ પણ કહ્યું કે વાંગચુકની આસપાસ કેટલાક એવા લોકો હાજર છે, જેઓ તેમની સ્વાસ્થ્ય સ્થિતિની પરવા કર્યા વગર તેમને હોસ્પિટલની બહાર લઈ જવા માંગે છે.