ન્યુઝિલેન્ડના પ્રધાનમંત્રી લક્સને લીધી અક્ષરધામ મંદિરની મુલાકાત

ન્યુઝીલેન્ડના પ્રધાનમંત્રી ક્રિસ્ટોફર લક્સન 16-20 માર્ચ દરમિયાન ભારતની તેમની સત્તાવાર મુલાકાતના ત્રીજા દિવસે મંગળવારે નવી દિલ્હીમાં અક્ષરધામ મંદિરની મુલાકાત લીધી હતી. "ન્યુઝીલેન્ડના હિન્દુ સમુદાયે આપણા દેશ માટે મોટું યોગદાન આપ્યું છે.લક્સને ટ્વિટર પર લખ્યુ કે, આજે દિલ્હીમાં, મેં BAPS સ્વામિનારાયણ અક્ષરધામ મંદિરમાં દર્શન કર્યા- જે ઘણા કિવી-હિન્દુઓ માટે એક પવિત્ર સ્થળ છે," 

સોમવારે સાંજે ન્યુઝીલેન્ડના નેતાએ હૈદરાબાદ હાઉસમાં દ્વિપક્ષીય વાટાઘાટો બાદ પ્રધાનમંત્રી નરેન્દ્ર મોદી સાથે રાજધાનીમાં ગુરુદ્વારા રકાબ ગંજ સાહિબની મુલાકાત લીધી હતી. લક્ષ્મણે કહ્યું, "પ્રધાનમંત્રી નરેન્દ્ર મોદી અને મેં ઊંડી શ્રદ્ધા અને ઇતિહાસ ધરાવતા ગુરુદ્વારા રકાબ ગંજ સાહિબની મુલાકાત લીધી. સેવા અને માનવતા પ્રત્યે શીખ સમુદાયની અતૂટ પ્રતિબદ્ધતા પ્રશંસનીય છે."

મંગળવારે સાંજે દિલ્હીની મુલાકાત પૂર્ણ કરીને મુંબઈ જવા રવાના થતા પહેલા ન્યુઝીલેન્ડના પ્રધાનમંત્રી ઇન્ડિયા ગેટની મુલાકાત લેવા માટે પણ સમય કાઢ્યો હતો. સોમવારે ભારતમાં લક્સન અને કિવી પ્રતિનિધિમંડળનું સ્વાગત કરતા, પ્રધાનમંત્રી મોદીએ ન્યુઝીલેન્ડના પ્રધાનમંત્રીના ભારત પ્રત્યેના ઊંડા લગાવની નોંધ લીધી.

પ્રધાનમંત્રી મોદીએ કહ્યું, "આપણે બધાએ જોયું કે તેમણે થોડા દિવસો પહેલા ઓકલેન્ડમાં હોળીનો તહેવાર કેવી રીતે ઉજવ્યો! ન્યુઝીલેન્ડમાં રહેતા ભારતીય મૂળના લોકો પ્રત્યે પ્રધાનમંત્રી લક્સનનો પ્રેમ એ હકીકત પરથી પણ જોઈ શકાય છે કે એક મોટું સમુદાય પ્રતિનિધિમંડળ પણ તેમની સાથે ભારત આવ્યું છે."

બંને નેતાઓએ દ્વિપક્ષીય સંબંધોના વિવિધ ક્ષેત્રો પર ઊંડાણપૂર્વક ચર્ચા કરી અને સંરક્ષણ અને સુરક્ષા સહયોગને મજબૂત અને સંસ્થાકીય બનાવવાનો નિર્ણય લીધો. સોમવારે બંને પક્ષો વચ્ચે દ્વિપક્ષીય વાટાઘાટો પછી જારી કરાયેલા ભારત-ન્યુઝીલેન્ડ સંયુક્ત નિવેદનમાં કહેવામાં આવ્યું છે કે, "વડાપ્રધાનોએ બંને દેશોના લોકો વચ્ચેના મજબૂત સંબંધો પર સંતોષ વ્યક્ત કર્યો."