પશ્ચિમ રેલ્વે દ્વારા તહેવાર ધ્યાનમાં લઈને 3 વિશેષ ટ્રેનો ચલાવવામાં આવશે

સ્પેશિયલ ટ્રેનોના સંચાલન સાથે 344 વધારાના કોચ ઉમેરવામાં આવ્યા છે, જેનો લાભ આશરે 25,000 મુસાફરોને ખાસ કરીને તહેવારોની સિઝનમાં થશે.  

દિવાળીના તહેવારને ધ્યાનમાં લઈ પશ્ચિમ રેલ્વે દ્વારા તહેવાર વિશેષ 3 ટ્રેનો ચલાવવામાં આવશે. અમદાવાદ-પટના, સાબરમતી-દિલ્હી સરાય રોહિલ્લા અને ભાવનગર ટર્મિનસ-દિલ્હી સરાય રોહિલ્લા સ્ટેશનો વચ્ચે આ વિશેષ ટ્રેન દોડાવવામાં આવશે. સત્તાવાર યાદી મુજબ આ ફેસ્ટિવલ સ્પેશિયલ ટ્રેનોના સંચાલન સાથે 344 વધારાના કોચ ઉમેરવામાં આવ્યા છે, જેનો લાભ આશરે 25,000 મુસાફરોને ખાસ કરીને તહેવારોની સિઝનમાં થશે.  

અમદાવાદ-પટના સ્પેશિયલ અમદાવાદથી દર સોમવારે રાત્રે 11:05 મિનિટે ઉપડશે અને બુધવારે વહેલી સવારે 3:45 કલાકે પટના પહોંચશે. આ ટ્રેન 13 નવેમ્બર 2023 થી 27 નવેમ્બર 2023 સુધી ચાલશે. એ જ રીતે પટના-અમદાવાદ સ્પેશિયલ પટનાથી દર બુધવારે સવારે 6:45 વાગ્યે ઉપડશે અને બીજા દિવસે રાત્રે 12:20 કલાકે અમદાવાદ પહોંચશે. આ ટ્રેન 15 નવેમ્બર 2023 થી 29 નવેમ્બર 2023 સુધી ચાલશે.

 ભાવનગર ટર્મિનસ - દિલ્હી સરાય રોહિલ્લા સ્પેશિયલ ભાવનગર ટર્મિનસથી દર શુક્રવારે સવારે 10.10 કલાકે ઉપડશે અને બીજા દિવસે સવારે 08.50 કલાકે દિલ્હી સરાય રોહિલ્લા પહોંચશે. આ ટ્રેન 10 નવેમ્બર થી 1 ડિસેમ્બર 2023 સુધી ચાલશે. વળતામાં આ ટ્રેન દિલ્હી સરાય રોહિલાથી દર શનિવારે બપોરે 01:20 કલાકે અને બીજા દિવસે સવારે 10:55 કલાકે ભાવનગર ટર્મિનસ પહોંચશે.

સાબરમતી-દિલ્હી સરાય રોહિલ્લા સુપરફાસ્ટ સ્પેશિયલ આજથી  બપોરે 04:10 કલાકે સાબરમતીથી ઉપડીને બીજા દિવસે સવારે 08:50 કલાકે દિલ્હી સરાય રોહિલ્લા પહોંચશે. વળતામાં આ ટ્રેન શુક્રવારના રોજ બપોરે 01:20 કલાકે દિલ્હી સરાઈ રોહિલ્લાથી ઉપડશે અને બીજા દિવસે સવારે 05:15 કલાકે સાબરમતી પહોંચશે.