પ્રધાનમંત્રી મોદીએ હવામાન વિભાગના 150મા સ્થાપના દિવસ પર 'મિશન મૌસમ' લોન્ચ કર્યું

પ્રધાનમંત્રી નરેન્દ્ર મોદીએ મંગળવારે ભારતીય હવામાન વિભાગ (IMD)દ્વારા એક મહત્વાકાંક્ષી પહેલ 'મિશન મૌસમ' લોન્ચ કરી, કારણ કે સંસ્થાએ તેનો 150મો સ્થાપના દિવસ ઉજવ્યો હતો. આ કાર્યક્રમમાં બોલતા, પ્રધાનમંત્રી મોદીએ હવામાન વિભાગને ભારતની વૈજ્ઞાનિક યાત્રાના પ્રતીક તરીકે પ્રશંસા કરી, જે વર્ષોથી અદ્યતન વિજ્ઞાન અને ટેકનોલોજીમાં દેશની પ્રગતિને પ્રતિબિંબિત કરે છે.

આ પ્રસંગના મહત્વ પર પ્રકાશ પાડતા, પ્રધાનમંત્રી મોદીએ હવામાન વિભાગની સિદ્ધિઓની ઉજવણી માટે એક ખાસ ટપાલ ટિકિટ અને સ્મારક સિક્કો બહાર પાડવાની જાહેરાત કરી. પ્રધાનમંત્રી એ ટિપ્પણી કરી કે "આ 150 વર્ષોમાં, હવામાન વિભાગે માત્ર કરોડો ભારતીયોની સેવા જ નથી કરી પરંતુ, તે ભારતની વૈજ્ઞાનિક યાત્રાનું પ્રતીક પણ બની ગયું છે,". પ્રધાનમંત્રીએ રાષ્ટ્રીય હવામાનશાસ્ત્ર ઓલિમ્પિયાડનું આયોજન કરવા બદલ હવામાન વિભાગની પણ પ્રશંસા કરી, જેમાં હજારો વિદ્યાર્થીઓએ ભાગ લીધો, જેનાથી હવામાનશાસ્ત્રમાં તેમની રુચિ વધુ વધી.

પ્રધાનમંત્રીએ ભાર મૂક્યો કે IMD ની 150 વર્ષની યાત્રા વિજ્ઞાન અને ટેકનોલોજીમાં ભારતની પ્રગતિને પ્રતિબિંબિત કરે છે. "આ 150 વર્ષ ફક્ત દેશના હવામાન વિભાગની જ યાત્રા નથી પરંતુ, આપણા દેશમાં અદ્યતન વિજ્ઞાન અને ટેકનોલોજીની યાત્રા છે," તેમણે કહ્યું, વૈજ્ઞાનિક સંસ્થાઓમાં સંશોધન અને નવીનતા નવા ભારતના વિઝનમાં કેવી રીતે કેન્દ્રસ્થાને છે તે પર ભાર મૂક્યો. 

પ્રધાનમંત્રી નરેન્દ્ર મોદીએ IMD ના માળખાગત સુવિધાઓ અને ટેકનોલોજીમાં થયેલા નોંધપાત્ર સુધારાઓ પર પ્રકાશ પાડ્યો. "છેલ્લા 10 વર્ષોમાં, IMD ના માળખાગત સુવિધાઓ અને ટેકનોલોજીનું અભૂતપૂર્વ વિસ્તરણ થયું છે," તેમણે નોંધ્યું, ડોપ્લર હવામાન રડાર, ઓટોમેટિક હવામાન સ્ટેશનો, રનવે હવામાન દેખરેખ પ્રણાલીઓ અને જિલ્લાવાર વરસાદ દેખરેખ સ્ટેશનો જેવી આધુનિક સુવિધાઓની સંખ્યામાં અનેકગણો વધારો થયો છે. એન્ટાર્કટિકામાં સ્થિત દેશની બે હવામાનશાસ્ત્રીય વેધશાળાઓ, મૈત્રી અને ભારતીનો ઉલ્લેખ કરીને તેમણે એ પણ નિર્દેશ કર્યો કે ભારતની અવકાશ અને ડિજિટલ ટેકનોલોજી હવામાનશાસ્ત્રને કેવી રીતે લાભ આપી રહી છે. 

આ પ્રસંગે, પ્રધાનમંત્રી નરેન્દ્ર મોદીએ 'મિશન મૌસમ' રજૂ કર્યું, જે ભારતને આબોહવા-સ્માર્ટ રાષ્ટ્ર બનાવવા અને ટકાઉ ભવિષ્ય પ્રત્યે દેશની પ્રતિબદ્ધતાને મજબૂત બનાવવાના હેતુથી એક પહેલ છે. "મિશન મૌસમ ટકાઉ ભવિષ્ય અને ભવિષ્યની તૈયારી પ્રત્યે ભારતની પ્રતિબદ્ધતાનું પ્રતીક છે," તેમણે કહ્યું.

પ્રધાનમંત્રીએ IMD ના પાયાને મકરસંક્રાંતિના સાંસ્કૃતિક મહત્વ સાથે પણ જોડ્યુ હતું . “IMD ની સ્થાપના 15 જાન્યુઆરી 1975 ના રોજ મકરસંક્રાંતિના પ્રસંગે કરવામાં આવી હતી.  પ્રધાનમંત્રી નરેન્દ્ર  મોદીએ આ તહેવાર સાથેના તેમના અંગત જોડાણને યાદ કરતા કહ્યું કે ગુજરાતના વ્યક્તિ તરીકે, મકરસંક્રાંતિ મારો પ્રિય તહેવાર છે. આ દિવસે, ગુજરાતના લોકો પતંગ ઉડાડવા માટે તેમના ધાબા પર જાય છે, અને જ્યારે હું ગુજરાતમાં હતો ત્યારે હું પણ આવું જ કરતો હતો,”. 

‘મિશન મૌસમ’ના લોન્ચિંગની સાથે, પીએમ મોદીએ એક સ્મારક સિક્કો અને ‘વિઝન 2047’દસ્તાવેજ પણ બહાર પાડ્યો, જેમાં તેના વિકાસના આગામી તબક્કા માટે IMDના લક્ષ્યોની રૂપરેખા આપવામાં આવી હતી. કાર્યક્રમમાં હાજર કેન્દ્રીય મંત્રી જીતેન્દ્ર સિંહે IMDની પ્રગતિની પ્રશંસા કરી, અને જાહેર કર્યું કે છેલ્લા દાયકામાં હવામાન આગાહીઓની ચોકસાઈમાં 50%નો સુધારો થયો છે. તેમણે એ પણ નોંધ્યું કે PM મોદીના નેતૃત્વમાં રડાર નેટવર્કની સંખ્યા નોંધપાત્ર રીતે મુઠ્ઠીભરથી વધીને 39 થઈ ગઈ છે.