ભારત-કેનેડા સંબંધોને મજબૂત કરવા પર ભાર: વિદેશ મંત્રી એસ. જયશંકરે કેનેડિયન સમકક્ષ અનિતા આનંદ સાથે કરી વાતચીત

વિદેશ મંત્રી ડૉ. એસ. જયશંકરે કેનેડાના વિદેશ મંત્રી અનિતા આનંદ સાથે દ્વિપક્ષીય વાટાઘાટો કરી. તેમણે ભારત-કેનેડાના મજબૂત સંબંધો માટે 'પૂરક અર્થતંત્ર' અને 'વિવિધતા'ને પાયાના સ્તંભ ગણાવ્યા. બંને દેશોએ વેપાર, કૃત્રિમ બુદ્ધિ અને ઊર્જા સહિતના ક્ષેત્રોમાં મહત્વાકાંક્ષી રોડમેપ પર ભાર મૂક્યો.

વિદેશ મંત્રી ડૉ. એસ. જયશંકરે સોમવારે તેમના કેનેડિયન સમકક્ષ અનિતા આનંદ સાથે દ્વિપક્ષીય વાટાઘાટો યોજી હતી. આ બેઠક દરમિયાન, તેમણે પ્રધાનમંત્રી નરેન્દ્ર મોદી અને કેનેડાના પ્રધાનમંત્રી  માર્ક કાર્ની વચ્ચેની મુલાકાતમાંથી ઉદ્ભવેલા સકારાત્મક વિચારને પુનરાવર્તિત કર્યો હતો.

સંબંધોનો પાયો: પૂરક અર્થતંત્ર અને વિવિધતા

ડૉ. જયશંકરે દિલ્હીના હૈદરાબાદ હાઉસ ખાતે મુલાકાતી નેતા સાથેની વાતચીતમાં ભારપૂર્વક જણાવ્યું કે, "સહકાર પુનઃસ્થાપિત કરવા અને બંને પ્રધાનમંત્રીઓની અપેક્ષાઓ પૂર્ણ કરવા માટે કામ કરવાની આપણી જવાબદારી છે." તેમણે ભારત કેનેડાના સંબંધોના પાયા વિશે વાત કરતા કહ્યું, "જ્યારે આપણે કેનેડા તરફ જોઈએ છીએ, ત્યારે આપણે એક પૂરક અર્થતંત્ર, વધુ ખુલ્લો સમાજ, વિવિધતા અને બહુલતા જોઈએ છીએ, અને અમે માનીએ છીએ કે, આ એક નજીકના, સ્થાયી અને લાંબા ગાળાના સહકાર માળખાનો પાયો છે."

સહયોગ માટે મહત્વાકાંક્ષી રોડમેપ

વિદેશ મંત્રીએ જણાવ્યું કે આજની બેઠક માટે બંને પક્ષોએ વેપાર, રોકાણ, કૃષિ, વિજ્ઞાન અને ટેકનોલોજી, નાગરિક પરમાણુ સહયોગ, AI, મહત્વપૂર્ણ ખનિજો અને ઉર્જા સહિત વિવિધ ક્ષેત્રોમાં સહયોગને આગળ વધારવા માટે એક મહત્વાકાંક્ષી રોડમેપની રૂપરેખા આપી છે. તેમણે બંને દેશોના ઉચ્ચ કમિશનરોએ પોતપોતાની જવાબદારીઓ સંભાળી હોવા બદલ સંતોષ પણ વ્યક્ત કર્યો.

સકારાત્મક માનસિકતા સાથે આગળ વધવાનો અભિગમ

ડૉ. જયશંકરે ભારત અને કેનેડાની વિશ્વ બાબતોમાં સક્રિય રહેવાની લાંબી પરંપરાને યાદ કરી અને કહ્યું કે અનિતા આનંદની મુલાકાત વૈશ્વિક પરિદૃશ્યની સમીક્ષા કરવાની તક પૂરી પાડશે. તેમણે ઉમેર્યું કે છેલ્લા કેટલાક મહિનાઓમાં દ્વિપક્ષીય સંબંધોમાં સતત પ્રગતિ જોવા મળી છે અને પ્રધાનમંત્રી મોદીના કથન મુજબ, "ભારતનો અભિગમ સકારાત્મક માનસિકતા સાથે આગળ વધવાનો છે."

કેનેડાના વિદેશ મંત્રી અનિતા આનંદે પણ તેમના પ્રારંભિક નિવેદનમાં સંબંધોને પુનઃસ્થાપિત કરવા વિશે વાત કરી હતી. તેમણે પ્રધાનમંત્રી મોદી સાથેની તેમની વ્યક્તિગત મુલાકાતનો અને 18 સપ્ટેમ્બરના રોજ બંને એનએસએ વચ્ચે થયેલી બેઠકને મહત્વપૂર્ણ ગણાવી હતી. તેમણે ભારપૂર્વક જણાવ્યું કે, "અમે વર્તમાન અને લાંબા ગાળે, ખાસ કરીને ઇન્ડો-પેસિફિક ક્ષેત્રમાં અમારી પરસ્પર પ્રાથમિકતાઓ પર, આ સંબંધને આગળ વધારવા માટે સામૂહિક રીતે પ્રતિબદ્ધ છીએ."

તેમણે ભારત-કેનેડા સંયુક્ત નિવેદનનો ઉલ્લેખ કર્યો જે મહત્વપૂર્ણ ખનિજો, કૃત્રિમ બુદ્ધિ અને ઊર્જા જેવા મુખ્ય ક્ષેત્રોમાં સંબંધોને મજબૂત બનાવશે. તેમણે સુરક્ષા અને કાયદા અમલીકરણ અધિકારીઓ વચ્ચે થયેલી ફળદાયી બેઠકનો પણ ઉલ્લેખ કર્યો અને સંવાદો ચાલુ રાખવાના મહત્વ પર ભાર મૂક્યો.