મણિપુરના 5 જિલ્લાઓમાં ઇન્ટરનેટ સેવા સ્થગિત,હિંસા બાદ વહીવટીતંત્રનું કડક વલણ

મણિપુર સરકારે 5 રાજ્યોમાં ઇન્ટરનેટ સેવા અને મોબાઇલ ડેટા સેવા પર પ્રતિબંધ મૂક્યો છે. સરકારનું કહેવું છે કે રાજ્યમાં સોશિયલ મીડિયા દ્વારા ખોટી માહિતી ફેલાવવામાં આવી રહી છે. સરકારે 7 જૂને નોટિસ જારી કરીને તાત્કાલિક અસરથી આ આદેશનો અમલ કર્યો છે.

અધિકારીઓએ રવિવારે જણાવ્યું હતું કે મણિપુરમાં આતંકવાદી મૈતેઈ સંગઠન 'અરંબાઈ ટેંગોલે'ના એક નેતા અને ચાર સભ્યોની ધરપકડ સામે થયેલા હિંસક વિરોધને ધ્યાનમાં રાખીને આ પગલું લેવામાં આવ્યું છે.

સાવચેતીના પગલા તરીકે, ભારતીય નાગરિક સુરક્ષા સંહિતા (BNSS) ની કલમ 163 હેઠળ ઇમ્ફાલ ખીણના પાંચ જિલ્લાઓ - ઇમ્ફાલ પશ્ચિમ, ઇમ્ફાલ પૂર્વ, થૌબલ, બિષ્ણુપુર અને કાકચિંગમાં અનિશ્ચિત સમય માટે કર્ફ્યુ લાદવામાં આવ્યો છે, એમ એક વરિષ્ઠ અધિકારીએ જણાવ્યું હતું.

રવિવારે અલગ અલગ આદેશોમાં મૈતેઈ સમુદાયના લોકોથી ભરેલા આ પાંચ જિલ્લાઓના જિલ્લા મેજિસ્ટ્રેટે BNSS ની કલમ 163 હેઠળ પાંચ કે તેથી વધુ લોકોને ભેગા થવા અને લાકડીઓ, પથ્થરો, અગ્નિ હથિયારો અથવા તીક્ષ્ણ હથિયારો લઈ જવા પર પ્રતિબંધ મૂક્યો હતો.

શનિવારે મોડી રાત્રે આ પાંચ ખીણ જિલ્લાઓમાં VSAT અને VPN સુવિધાઓ સહિત ઇન્ટરનેટ અને મોબાઇલ ડેટા સેવાઓ સ્થગિત કરવામાં આવી હતી.