રાષ્ટ્રપતિ મુર્મુ અને દાવકોવાની મહત્ત્વપૂર્ણ મુલાકાત, ભારત-ઉત્તર મેસેડોનિયા દ્વિપક્ષીય સહયોગ વધારવા પર ચર્ચા

રાષ્ટ્રપતિ દ્રૌપદી મુર્મુ અને ઉત્તર મેસેડોનિયાના રાષ્ટ્રપતિ ગોર્ડાના સિલ્યાનોવસ્કા-દાવકોવાએ મંગળવારે(21 જુલાઈ) સ્કોપ્જે સ્થિત વિલા વોડ્નોમાં મુલાકાત કરી. બંને નેતાઓએ ભારત અને ઉત્તર મેસેડોનિયા વચ્ચેના સંબંધોને મજબૂત કરવા પર ચર્ચા કરી. વાતચીતમાં ખાસ કરીને અર્થવ્યવસ્થા, શિક્ષણ, વિજ્ઞાન, સંસ્કૃતિ, પર્યટન, સ્વાસ્થ્ય સેવાઓ અને ડિજિટલ પરિવર્તન જેવા ક્ષેત્રોમાં સાથે મળીને કામ કરવાની નવી તકો પર ભાર મૂકવામાં આવ્યો હતો.

બંને નેતાઓએ ક્ષેત્રીય અને વૈશ્વિક મુદ્દાઓ પર વિચારોનું આદાન-પ્રદાન કર્યું. રાષ્ટ્રપતિ મુર્મુ અને રાષ્ટ્રપતિ દાવકોવાએ ભારત અને ઉત્તર મેસેડોનિયાના સંબંધોને આગળ વધુ મજબૂત કરવાની પોતાની પ્રતિબદ્ધતા દોહરાવી. બેઠક પહેલાં રાષ્ટ્રપતિ મુર્મુનું ઓપચારિક સ્વાગત કરવામાં આવ્યું અને ગાર્ડ ઓફ ઓનર આપવામાં આવ્યું. 

રાષ્ટ્રપતિ સચિવાલયે સોશિયલ મીડિયા પ્લેટફોર્મ 'એક્સ' પર લખ્યું, "રાષ્ટ્રપતિ દ્રૌપદી મુર્મુનું ઉત્તર મેસેડોનિયાના રાષ્ટ્રપતિ ગોર્ડાના સિલ્યાનોવસ્કા-દાવકોવાએ સ્કોપ્જેના વિલા વોડ્નોમાં ઉષ્માભેર સ્વાગત કર્યું. આ કોઈપણ ભારતીય રાષ્ટ્રપતિની આ દેશની પહેલી રાજકીય યાત્રા છે. તેમને ઔપચારિક સ્વાગત અને ગાર્ડ ઓફ ઓનર આપવામાં આવ્યું. બંને નેતાઓએ દ્વિપક્ષીય સહયોગના તમામ મહત્ત્વપૂર્ણ પાસાઓ પર ચર્ચા કરી અને ક્ષેત્રીય અને વૈશ્વિક મુદ્દાઓ પર પોતાના વિચારો શેર કર્યા. બંનેએ સહિયારા લોકશાહી મૂલ્યો અને પરસ્પર આદર પર આધારિત ગાઢ અને મૈત્રીપૂર્ણ સંબંધોની પુનઃ પુષ્ટિ કરી."

રાષ્ટ્રપતિ દાવકોવાએ જણાવ્યું કે, રાષ્ટ્રપતિ મુર્મુની આ યાત્રા બંને દેશો વચ્ચેના સહયોગને મજબૂત કરવાની દિશામાં એક મહત્ત્વપૂર્ણ પગલું છે. તેમણે 'એક્સ' પર લખ્યું કે, "આપણા દેશની અધિકૃત યાત્રા પર આવેલા ભારતના પ્રથમ રાષ્ટ્રપતિ દ્રૌપદી મુર્મુનું સ્વાગત કરવું મારા માટે મોટા સન્માનની વાત છે. અમે મેસેડોનિયા અને ભારતના સંબંધો પર ચર્ચા કરી, જેમાં અર્થવ્યવસ્થા, શિક્ષણ, વિજ્ઞાન, સંસ્કૃતિ, પર્યટન, સ્વાસ્થ્ય સેવાઓ અને ડિજિટલ પરિવર્તનના ક્ષેત્રોમાં સહયોગની સંભાવનાઓ પર વિશેષ ધ્યાન આપવામાં આવ્યું."

તેમણે ઉમેર્યું, "આ યાત્રા ભારત સાથેના આપણા સહયોગને વધારવા અને મજબૂત કરવાની દિશામાં એક મહત્ત્વપૂર્ણ પગલું છે. મધર ટેરેસાની સહિયારી માનવીય વારસો અને અસંલગ્ન આંદોલન (નૉન-અલાઈન્ડ મૂવમેન્ટ)નો અનુભવ આપણા સંબંધોના નવા તબક્કા માટે મજબૂત પાયો પૂરો પાડે છે." રાષ્ટ્રપતિ મુર્મુ મંગળવારે પોતાની ત્રણ દેશોની યાત્રાના બીજા તબક્કામાં ઉત્તર મેસેડોનિયા પહોંચ્યા હતા. આ પહેલાં તેમણે મોલડોવાની પોતાની યાત્રા સફળતાપૂર્વક પૂર્ણ કરી હતી.