લોકસભાની કાર્યવાહી અનિશ્ચિતકાળ માટે સ્થગિત કરવામાં આવી

આજે ગૃહની કાર્યવાહી શરૂ થઈ ત્યારે સ્પીકર ઓમ બિરલાએ ચોમાસા સત્ર દરમિયાન થયેલા કામકાજ વિશે માહિતી આપી હતી. તેમણે કહ્યું હતું કે, આ સત્રમાં 44 કલાકથી વધુ કામ થયું અને  અવિશ્વાસ પ્રસ્તાવ પર લગભગ 20 કલાક સુધી ગૃહમાં ચર્ચા થઈ, જેમાં 60 સભ્યોએ ભાગ લીધો. ડિજિટલ ડેટા પ્રોટેક્શન બિલ સહિત કુલ 12 બિલ પસાર કરવામાં આવ્યા હતા. આ પહેલા લોકસભાની કાર્યવાહી ત્રણ વખત સ્થગિત કરવામાં આવી હતી. કોંગ્રેસના સભ્યોએ ગઈકાલે તેમના નેતા અધીર રંજન ચૌધરીને ગૃહમાંથી સસ્પેન્ડ કરવાને લઈને હોબાળો મચાવ્યો હતો. આજે સવારે ગૃહની કાર્યવાહી શરૂ થતાં જ કોંગ્રેસના સાંસદોએ આ મુદ્દો ઉઠાવવાનો પ્રયાસ કર્યો હતો, પરંતુ સ્પીકર ઓમ બિરલાએ તેને મંજૂરી આપી ન હતી. આ અંગે કોંગ્રેસના નેતાઓએ હોબાળો મચાવ્યો હતો. બાદમાં સ્પીકરે ગૃહની કાર્યવાહી બપોરે 12 વાગ્યા સુધી સ્થગિત કરી દીધી હતી. અધીર રંજન ચૌધરીને ગઈકાલે તેમના અભદ્ર વર્તન બદલ લોકસભામાંથી સસ્પેન્ડ કરવામાં આવ્યા હતા અને આ મામલો વિશેષાધિકાર સમિતિને મોકલવામાં આવ્યો હતો. જ્યાં સુધી સમિતિ નિર્ણય ન લે ત્યાં સુધી. તેઓ સસ્પેન્ડ રહેશે. પ્રથમ સ્થગિત કર્યા પછી જ્યારે કાર્યવાહી ફરી શરૂ થઈ ત્યારે કોંગ્રેસ, ડીએમકે અને ટીએમસી સહિતના વિપક્ષી સભ્યો ગૃહની મધ્યમાં પહોંચ્યા અને સૂત્રોચ્ચાર કરવા લાગ્યા. આ દરમિયાન, ગુડ્સ એન્ડ સર્વિસ ટેક્સ એમેન્ડમેન્ટ બિલ 2023 અને ઇન્ટિગ્રેટેડ ગુડ્સ એન્ડ સર્વિસ ટેક્સ એમેન્ડમેન્ટ બિલ 2023 રજૂ કરવામાં આવ્યા હતા અને ચર્ચા કર્યા વિના પસાર કરવામાં આવ્યા હતા.