સંસદના શિયાળુ સત્ર પહેલાં યોજાઈ સર્વપક્ષીય બેઠક, મુખ્ય મુદ્દાઓ પર કરાઈ ચર્ચા

સંસદનાં શિયાળુ સત્ર પહેલાં કેન્દ્રીય સંસદીય બાબતોના પ્રધાન કિરેન રિજિજુએ સર્વપક્ષીય બેઠક બોલાવી હતી. રાષ્ટ્રીય રાજધાનીમાં સંસદ ભવન એનેક્સીના મુખ્ય સમિતિ રૂમમાં આ બેઠક યોજાઈ હતી. આ બેઠકની અધ્યક્ષતા રક્ષા મંત્રી રાજનાથ સિંહે કરી હતી.

આ બેઠકમાં કોંગ્રેસના નેતાઓ જયરામ રમેશ, પ્રમોદ તિવારી અને કે. જેડીયુ સાંસદ ઉપેન્દ્ર કુશવાહા હાજર રહ્યા હતા. આ ઉપરાંત, YSRCPના પીવી મિથુન રેડ્ડી અને વી વિજયસાઈ રેડ્ડી, BJDના સસ્મિત પાત્રા, MDMKના વાઈકો, SPના રામ ગોપાલ યાદવ અને TDPના લવુ શ્રી કૃષ્ણ દેવા રાયાલુ જેવા નેતાઓએ પણ આપી હતી હાજરી. 

શિયાળુ સત્ર 25 નવેમ્બરથી શરૂ થશે અને 20 ડિસેમ્બર સુધી ચાલશે. આ સત્રમાં ઘણા મહત્વપૂર્ણ મુદ્દાઓ પર ચર્ચા થવાની આશા છે. કોંગ્રેસે સંકેત આપ્યો છે કે તે મણિપુરની સ્થિતિ, અદાણી જૂથ સાથે સંબંધિત વિવાદ અને વાસ્તવિક નિયંત્રણ રેખા (LAC) પર સરહદી તણાવ જેવા મુદ્દા ઉઠાવશે.

સરકારની મુખ્ય કાયદાકીય પ્રાથમિકતાઓમાં વકફ સુધારા બિલ 2024નો સમાવેશ થાય છે, જે હાલમાં સંયુક્ત સંસદીય સમિતિ દ્વારા સમીક્ષા હેઠળ છે. આ સમિતિ વિવાદોને ઉકેલવા અને સર્વસંમતિ બનાવવા માટે વિવિધ રાજ્યોમાં વિવિધ હિતધારકો સાથે ચર્ચા કરી રહી છે. સમિતિનો અહેવાલ સત્રના પ્રથમ સપ્તાહમાં રજૂ કરવામાં આવે તેવી શક્યતા છે.

આ સિવાય સરકાર 'વન નેશન, વન ઈલેક્શન' બિલ રજૂ કરી શકે છે. તાજેતરમાં, પ્રધાન મંત્રી નરેન્દ્ર મોદીએ લોકસભા અને રાજ્યોની વિધાનસભાની ચૂંટણીઓ એકસાથે યોજવાના મહત્વ પર ભાર મૂક્યો હતો. તેમણે કહ્યું કે આ સંસાધનોના વધુ સારા ઉપયોગ સાથે ભારતના લોકતંત્રને મજબૂત કરશે. વડાપ્રધાને યુનિફોર્મ સિવિલ કોડ (યુસીસી) લાગુ કરવાના પ્રયાસો પર પણ ભાર મૂક્યો હતો.

જો કે કોંગ્રેસે 'વન નેશન, વન ઈલેક્શન' પ્રસ્તાવનો વિરોધ કર્યો છે. કોંગ્રેસનું કહેવું છે કે પ્રધાનમંત્રીએ આ મુદ્દે આગળ વધતા પહેલાં સંસદના તમામ સભ્યોનો વિશ્વાસ જીતવો પડશે.

26 નવેમ્બરે બંધારણ દિવસની ઉજવણી માટે લોકસભા અને રાજ્યસભાની કોઈ બેઠક નહીં હોય. શિયાળુ સત્રમાં સરકારના મહત્વપૂર્ણ કાયદાકીય એજન્ડા તેમજ વિપક્ષ દ્વારા ઉઠાવવામાં આવેલા મુખ્ય રાજકીય અને સામાજિક મુદ્દાઓ પર ચર્ચા થવાની સંભાવના છે.