હજ 2025 માટે અરજી શરૂ થઈ, આ વખતે 1,75,025 હજયાત્રીઓનો ક્વોટા

કેન્દ્રીય મંત્રી કિરેન રિજિજુએ હજ કમિટી ઓફ ઈન્ડિયા દ્વારા હજ-2025 માટેની અરજી પ્રક્રિયા શરૂ કરી હતી. સાઉદી અરેબિયાએ હજ-2025 માટે ભારતને 1,75,025નો ક્વોટા ફાળવ્યો છે. આ વખતે તમે 'હજ સુવિધા એપ' દ્વારા પણ અરજી કરી શકો છો.

હજ કમિટી ઓફ ઈન્ડિયાની વેબસાઈટ ઉપરાંત પ્રથમ વખત હજ સુવિધા એપ પર પણ અરજીઓ મંગાવવામાં આવી છે. હજ-2025 માટે અરજી કરતા હજયાત્રીઓને મદદ કરવા માટે સોશિયલ મીડિયા પર સમર્પિત ચેનલો સાથે હજ કમિટી ઓફ ઈન્ડિયાની હેલ્પલાઈન પણ ચલાવવામાં આવી રહી છે.

‘હજ સુવિધા એપ’ યાત્રાળુઓને તાલીમ સામગ્રી, રહેઠાણ અને ફ્લાઇટની વિગતો, સામાનની માહિતી, ઇમરજન્સી હેલ્પલાઇન (SOS), ફરિયાદ નિવારણ, પ્રતિસાદ, ભાષા અનુવાદ અને તીર્થયાત્રાને લગતી વિવિધ માહિતી અને સેવાઓની ઍક્સેસ પ્રદાન કરે છે.

હજ-2025 માટે હજની તૈયારીની પ્રક્રિયા આ વખતે વહેલી શરૂ કરવામાં આવી છે. 19 જુલાઈના રોજ કેન્દ્રીય લઘુમતી બાબતોના મંત્રીની અધ્યક્ષતામાં હજ સમીક્ષા બેઠક યોજાઈ હતી અને 5 ઓગસ્ટે હજ નીતિ-2025ની જાહેરાત કરવામાં આવી હતી.

નોંધનીય છે કે હજ પ્રશાસનમાં કરાયેલા સૌથી મોટા સુધારામાંનો એક એ છે કે લેડીઝ વિધાઉટ મેહરમ (LWM) કેટેગરી હેઠળ 45 વર્ષ અને તેથી વધુ ઉંમરની મુસ્લિમ મહિલાઓને મેહરમ (પુરુષ સાથી) વિના હજ કરવાની મંજૂરી આપવી. અત્યાર સુધીની સૌથી મોટી સંખ્યા, 4558 મહિલાઓએ 2024માં LWM શ્રેણી હેઠળ હજ કરી છે.