ભારતે રોમાંચક ફાઇનલમાં મલેશિયાને 4-3થી હરાવીને ચોથી વખત એશિયન ચેમ્પિયન્સ ટ્રોફીનો ખિતાબ જીત્યો

ચેન્નાઈમાં રમાઈ રહેલી એશિયન ચેમ્પિયન્સ ટ્રોફીનું ટાઈટલ ભારતીય હોકી ટીમે જીતી લીધું છે. મલેશિયા સામેની રોમાંચક ફાઇનલમાં, ભારતે ત્રીજા ક્વાર્ટરમાં એક મિનિટની અંદર બે ગોલ ફટકારીને એક તબક્કે 1-3થી નીચેથી પુનરાગમન કર્યું હતું. ચોથા ક્વાર્ટરમાં ચોથો ગોલ કરીને ભારતીય ટીમે મેચ 4-3થી જીતી લીધી અને ચોથી વખત એશિયન ચેમ્પિયન્સ ટ્રોફીનું ટાઇટલ કબજે કર્યું. હવે ભારત એશિયન ચેમ્પિયન્સ ટ્રોફી સૌથી વધુ વખત જીતનાર દેશ બની ગયો છે. પાકિસ્તાન ત્રણ વખત આ ખિતાબ જીતી ચૂક્યું છે. આ પહેલા ભારતે 2011, 2016 અને 2018માં આ ટ્રોફી જીતી હતી. ભારત અને પાકિસ્તાન 2018 માં સંયુક્ત વિજેતા હતા, કારણ કે ફાઈનલ વરસાદને કારણે રદ કરવામાં આવી હતી. ટીમ ઈન્ડિયા પાંચ વર્ષ બાદ ફરી એકવાર ચેમ્પિયન બની છે. આ સમગ્ર ટૂર્નામેન્ટમાં ભારતીય ટીમ અજેય રહી હતી. ભારતીય હોકી ટીમે હવે હાંગઝોઉ એશિયન ગેમ્સમાં ભાગ લેવાની છે. આવી સ્થિતિમાં આ જીતે ભારતીય ખેલાડીઓનું મનોબળ વધાર્યું હશે.