શેરબજાર ધડાકો, સેન્સેક્સ 1,017 પોઈન્ટ ઘટ્યો, રોકાણકારોએ રૂ. 5 લાખ કરોડ ગુમાવ્યા

શુક્રવારે ભારતીય શેરબજારમાં મોટો ઘટાડો જોવા મળ્યો હતો. શુક્રવારે રાત્રે જાહેર થનારા યુએસ જોબ્સ રિપોર્ટને કારણે બજારમાં મંદી આવી રહી છે. આ ડેટાને વ્યાજ દરમાં ઘટાડા માટે મહત્વનો આધાર માનવામાં આવે છે.

ટ્રેડિંગના અંતે સેન્સેક્સ 1,017 પોઈન્ટ અથવા 1.24 ટકા ઘટીને 81,183 પર અને નિફ્ટી 292 પોઈન્ટ અથવા 1.17 ટકા ઘટીને 24,852 પર હતો. ભારે ઘટાડાને કારણે બોમ્બે સ્ટોક એક્સચેન્જ (BSE) પર લિસ્ટેડ તમામ કંપનીઓનું માર્કેટ કેપ રૂ. 5.3 લાખ કરોડ ઘટીને રૂ. 460.04 લાખ કરોડ થયું છે, જે ગુરુવારે રૂ. 465 લાખ કરોડથી વધુ હતું.

SBI, ICICI બેંક, NTPC, HCL ટેક, રિલાયન્સ, ટાટા મોટર્સ, ITC, એક્સિસ બેંક, ઇન્ફોસિસ, L&T, M&M, મારુતિ સુઝુકી, અલ્ટ્રાટેક સિમેન્ટ અને વિપ્રો સેન્સેક્સ પેકમાં ટોપ લુઝર હતા. બજાજ ફાઈનાન્સ, એશિયન પેઈન્ટ્સ, જેએસડબ્લ્યુ સ્ટીલ અને એચયુએલ ટોપ ગેનર હતા.

બજારના તમામ ઈન્ડેક્સ લાલ નિશાનમાં બંધ થયા છે. સૌથી વધુ ઘટાડો ઓટો, પીએસયુ બેન્ક, ફિન સર્વિસ, મીડિયા, એનર્જી, પ્રાઈવેટ બેન્ક, ઈન્ફ્રા, રિયલ્ટી અને એફએમસીજી ઈન્ડેક્સમાં જોવા મળ્યો હતો.

નિફ્ટી મિડકેપ 100 ઈન્ડેક્સ 946 પોઈન્ટ્સ અથવા 1.59 ટકા ઘટીને 58,501 પર અને નિફ્ટી સ્મોલકેપ 100 ઈન્ડેક્સ 244 પોઈન્ટ્સ અથવા 1.25 ટકા ઘટીને 19,275 પર આવ્યો હતો. માર્કેટમાં વધઘટ દર્શાવતો ઈન્ડિયા વિક્સ 7 ટકા વધીને 15.21 પર બંધ રહ્યો હતો.

સ્વસ્તિક ઇન્વેસ્ટમાર્ટના રિસર્ચ હેડ સંતોષ મીનાએ જણાવ્યું હતું કે, બજારમાં ઊંચા સ્તરેથી ઘટાડો જોવા મળ્યો છે. તેનું મુખ્ય કારણ શુક્રવારે રાત્રે આવતા યુએસ જોબ્સ ડેટા છે. જો તે નબળું પડશે તો વિશ્વની સૌથી મોટી અર્થવ્યવસ્થામાં મંદીની શક્યતા વધી જશે. તે જ સમયે, MSCI ઇમર્જિંગ માર્કેટમાં ભારતનું વેઇટેજ ચીન કરતાં વધુ થઈ ગયું છે. આ કારણે ભારતીય બજારના ઊંચા મૂલ્યાંકનને કારણે ફાળવણી વેઇટેજમાં ઘટાડો થવાનું જોખમ વધી ગયું છે.