નાયબ મુખ્યમંત્રી નીતિન પટેલના જન્મદિવસ નિમિત્તે રક્તદાન કેમ્પ યોજાયો

મહેસાણા જિલ્લાની વિવિધ સંસ્થાઓ દ્વારા નાયબ મુખ્યમંત્રી નીતિનભાઇ પટેલના ૬૩ મા જન્મ દિવસની ઉજવણી કડી ટાઉન હોલ G.I.D.C. હોલ ખાતે રક્તદાન કેમ્પ યોજી કરવામાં આવી હતી.

સરદાર યુવક મંડળ સહિત વિવિધ મંડળો દ્વારા વિવિધ સેવા ભાવી કાર્યક્રમોનું આયોજન નાયબ મુખ્યમંત્રીના જન્મ દિવસે કરવામાં આવ્યું હતું. મહેસાણા જિલ્લામાં કડી અને મહેસાણા માં વિવિધ બ્લડ બેન્કના સહયોગથી રકતદાન કેમ્પના આયોજનમાં ૧૮૦૮ રકત યુનિટ એકત્રિત કરવામાં આવ્યું હતું. રક્તદાતાઓ માટે ચા-નાસ્તા તેમજ પ્રોત્સાહનની અલાયદી વ્યવસ્થા કરવામાં આવી હતી. નાયબ મુખ્યમંત્રી નીતિનભાઇ પટેલે જણાવ્યું હતું કે, રક્તદાન કેમ્પ થકી માનવ સેવાનો અનોખો કાર્યક્રમ થયો છે. રાજ્ય સરકાર છેવાડાના માનવીનો વિકાસ થાય તે દિશામાં કામ કરી રહી છે. નાયબ મુખ્યમંત્રીએ હૉસ્પિટલમાં દર્દીઓ સાથે જન્મ દિવસની ઉજવણી કરી હતી. કાર્યક્રમમાં નાયબ મુખ્યમંત્રીનાં ધર્મ પત્ની સહિત આગેવાનો, કાર્યકરો, વિવિધ એસોસિએશના કાર્યકરો અને મોટી સંખ્યામાં શહેરીજનો ઉપસ્થિત રહ્યા હતા.