ટ્રમ્પ વહીવટમાં મોટો ફેરફાર, માઈક વોલ્ટ્ઝને હટાવીને માર્કો રુબિયોને બનાવ્યા રાષ્ટ્રીય સુરક્ષા સલાહકાર

વૉશિંગ્ટન: ટ્રમ્પ વહીવટીતંત્રમાં ઘણી ઉથલપાથલ ચાલી રહી છે. અમેરિકાના રાષ્ટ્રીય સુરક્ષા સલાહકાર (NSA) માઈક વૉલ્ટ્ઝનું વ્હાઇટ હાઉસ છોડવાનું નિશ્ચિત છે. રાષ્ટ્રીય સુરક્ષા સલાહકાર માઈક વૉલ્ટ્ઝને રાષ્ટ્રીય સુરક્ષા માહિતી લીક કરવાના દોષી ઠેરવવામાં આવ્યા છે. તેથી, તેમણે પોતાના પદ પરથી રાજીનામું આપવું પડશે.

સૂત્રોના જણાવ્યા અનુસાર, રાષ્ટ્રપતિ ડોનાલ્ડ ટ્રમ્પના બીજા કાર્યકાળ દરમિયાન સ્ટાફમાં આ પહેલો મોટો ફેરફાર છે. તમને જણાવી દઈએ કે માઈક વોલ્ટ્ઝ માર્ચમાં ત્યારે કડક તપાસના ઘેરામાં આવી ગયા જ્યારે એવું બહાર આવ્યું કે તેમણે પત્રકાર જેફરી ગોલ્ડબર્ગને એન્ક્રિપ્ટેડ મેસેજિંગ એપ સિગ્નલ પર એક ખાનગી 'ટેક્સ્ટ ચેઈન'માં ઉમેર્યા હતા. એપ પરની આ 'ટેક્સ્ટ ચેઇન'નો ઉપયોગ યમનમાં હુથી આતંકવાદીઓ સામે 15 માર્ચે યોજાનારી સંવેદનશીલ લશ્કરી કાર્યવાહીના આયોજનની ચર્ચા કરવા માટે કરવામાં આવ્યો હતો.

ટ્રમ્પના વહીવટ છોડનારા પહેલા સાથીદાર માઈક

માઈક વૉલ્ટ્ઝ ટ્રમ્પના વહીવટ છોડનારા પહેલા સાથીદાર હશે. ટ્રમ્પ બીજી વખત યુનાઇટેડ સ્ટેટ્સના રાષ્ટ્રપતિ બન્યા પછી 20 ફેબ્રુઆરી, 2025ના રોજ વોલ્ટ્ઝને NSA તરીકે નિયુક્ત કરવામાં આવ્યા હતા. રાષ્ટ્રપતિના અતિ-જમણેરી સાથી લૌરા લૂમરે પણ વોલ્ટ્ઝ પર નિશાન સાધ્યું છે. ઓવલ ઓફિસમાં હાલમાં થયેલી વાતચીત દરમિયાન તેમણે ટ્રમ્પને કહ્યું કે તેમણે તેમના એવા સહાયકોને હાંકી કાઢવા જોઈએ. જેઓ (લૌરા) માને છે કે તેમના "મેક અમેરિકા ગ્રેટ અગેઇન" એજન્ડા પ્રત્યે પૂરતા પ્રમાણમાં વફાદાર નથી.

નવા સુરક્ષા સલાહકાર નિયુક્ત

 યુએસ સેક્રેટરી ઓફ સ્ટેટ માર્કો રુબિયોને અસ્થાયી રૂપે રાષ્ટ્રીય સુરક્ષા સલાહકાર તરીકે નિયુક્ત કરવામાં આવ્યા છે. ટ્રમ્પે રૂબિયોની પ્રશંસા કરી અને કહ્યું કે વિદેશ વિભાગમાં મજબૂત નેતૃત્વ પૂરું પાડવા ઉપરાંત, તેઓ આ નવી જવાબદારી પણ ખૂબ સારી રીતે નિભાવશે. ટ્રમ્પે પોતાના નિવેદનમાં કહ્યું, "અમેરિકા અને દુનિયાને ફરીથી સુરક્ષિત બનાવવા માટે આપણે સાથે મળીને આપણી બધી શક્તિથી કામ કરીશું."