મેક્રોન-ટ્રમ્પ મુલાકાત: યુએસ રાષ્ટ્રપતિએ કહ્યું, 'યુક્રેનમાં યુદ્ધવિરામ રશિયાના હિતમાં છે'

યુએસ પ્રમુખ ડોનાલ્ડ ટ્રમ્પે કહ્યું કે યુક્રેન સાથે યુદ્ધવિરામ કરાર "રશિયાના હિતમાં" છે અને તેમનું માનવું છે કે રાષ્ટ્રપતિ વ્લાદિમીર પુતિન ઇચ્છે છે કે તે થાય.

દ્વિપક્ષીય વાટાઘાટો પછી સંયુક્ત પત્રકાર પરિષદમાં ટ્રમ્પે આ વાત કહી. ફ્રાન્સના રાષ્ટ્રપતિ મેક્રોને કહ્યું કે, યુદ્ધનો અંત લાવવા માટે કોઈપણ વાટાઘાટ કરાયેલા કરારમાં સુરક્ષા ગેરંટીઓને ધ્યાનમાં લેવી ખૂબ જ મહત્વપૂર્ણ છે.

યુક્રેન પર રશિયાના આક્રમણની ત્રીજી વર્ષગાંઠ નિમિત્તે 2022માં વ્હાઇટ હાઉસ ખાતે બંને નેતાઓ મળ્યા હતા. અગાઉ યુનાઇટેડ નેશન્સ જનરલ એસેમ્બલીમાં રશિયાને આક્રમક ગણાવતા ઠરાવ પર અમેરિકાએ તેના યુરોપિયન સાથીઓથી અલગ વલણ અપનાવ્યું હતું.

પુતિન પર વિશ્વાસ કરવા અંગે પૂછવામાં આવતા, રાષ્ટ્રપતિ ટ્રમ્પે કહ્યું, "સોદો કરવો રશિયાના હિતમાં છે, અને મને લાગે છે કે આપણે કરીશું." 

તેમણે વધુમાં કહ્યું કે તેમના બીજા કાર્યકાળની શરૂઆતમાં, તેમણે પહેલો ફોન રાષ્ટ્રપતિ પુતિનને કર્યો કારણ કે તેમને લાગ્યું કે પુતિન સમાધાન કરવા તૈયાર છે.

તેમણે કહ્યું. "રશિયા માટે સમજૂતી પર પહોંચવું અને પુતિન માટે સકારાત્મક રીતે રશિયાનું નેતૃત્વ કરવાનું ચાલુ રાખવું ફાયદાકારક છે," 

ટ્રમ્પે એમ પણ કહ્યું કે તેઓ યુક્રેન સાથે એક કરાર પર હસ્તાક્ષર કરવા તૈયાર છે જે યુક્રેનને તેની સુરક્ષા માટે અબજો ડોલરની સહાયના બદલામાં યુક્રેનમાંથી દુર્લભ ખનિજોના અધિકારો આપશે.

યુરોપિયન સાથીઓ સાથે અનેક રાઉન્ડની બેઠકો કર્યા બાદ રાષ્ટ્રપતિ મેક્રોન વોશિંગ્ટનમાં ટ્રમ્પને મળ્યા. "મને લાગે છે કે શાંતિ લાવવી ખૂબ જ મહત્વપૂર્ણ છે," તેમણે કહ્યું. મેક્રોને પોતાનું ભાષણ અંગ્રેજીમાં રજૂ કર્યું, જે તેમની માતૃભાષા નથી.

તેમણે વારંવાર ભાર મૂક્યો કે કોઈપણ શાંતિ કરારમાં સુરક્ષાની ખાતરી હોવી જોઈએ, જેનું પરીક્ષણ અને ચકાસણી થવી જોઈએ.

તેમણે કહ્યું. "મને લાગે છે કે, ચાલો કંઈક એવું મેળવવાનો પ્રયાસ કરીએ જેનું મૂલ્યાંકન, પરીક્ષણ અને ચકાસણી કરી શકાય અને ખાતરી કરીએ કે આપણે ટૂંકા ગાળામાં પૂરતી ગેરંટી આપી શકીએ," 

તેમણે વધુમાં કહ્યું, "મારા ઘણા યુરોપિયન સાથીઓ તેમાં જોડાવા માટે તૈયાર છે, પરંતુ અમને અમેરિકન સમર્થનની જરૂર છે, કારણ કે તે સુરક્ષા ગેરંટીની વિશ્વસનીયતાનો એક ભાગ છે અને તે આપણા સામૂહિક નિવારણનો પણ એક ભાગ છે."