વડાપ્રધાન નરેન્દ્ર મોદીનું જેદ્દાહમાં 21 તોપોની સલામી અને દેશભક્તિ ગીત સાથે ભવ્ય સ્વાગત

વડાપ્રધાન નરેન્દ્ર મોદી બે દિવસ સાઉદી એરેબિયાના પ્રવાસે છે, ત્યારે આજે મંગળવારે (22 એપ્રિલ, 2025) બપોરે જેદ્દાહ એરપોર્ટ પર વડાપ્રધાનનું ભવ્ય સ્વાગત કરવામાં આવ્યું હતું. આ દરમિયાન વડાપ્રધાનને 21 તોપોની સલામી આપવામાં આવી હતી અને આ પ્રસંગે સાઉદી અરેબિયાના એક વ્યક્તિએ તેમના માટે બોલિવૂડ ફિલ્મ 'રાઝી'નું ગીત 'એ વતન, મેરે વતન આબાદ રહે તુ' ગાયું હતું.

વડાપ્રધાન મોદીના જેદ્દાહ એરપોર્ટ પર ભવ્ય સ્વાગતને લઈને વિદેશ મંત્રાલયે સોશિયલ મીડિયા માધ્યમ 'X' પર પોસ્ટ કરીને લખ્યું હતું કે, 'ઐતિહાસિક બંદર શહેર જેદ્દાહમાં 21 તોપોની સલામી અને ઔપચારિક સ્વાગત. મક્કાના ડેપ્યુટી ગવર્નર, મહામહિમ પ્રિન્સ સઉદ બિન મિશાલ બિન અબ્દુલઅઝીઝ અલ સઉદ, વાણિજ્ય મંત્રી, મહામહિમ માજિદ બિન અબ્દુલ્લા અલ કસાબી અને જેદ્દાહના મેયર મહામહિમ સાલેહ અલી અલ-તુર્કી તરફથી ઉષ્માભર્યું સ્વાગત કરવામાં આવ્યું હતું.'

જ્યારે વડાપ્રધાન મોદીએ પોસ્ટ કરીને જણાવ્યું હતું કે, સાઉદી અરેબિયાના જેદ્દાહમાં ઉતર્યા. આ મુલાકાત ભારત અને સાઉદી અરેબિયા વચ્ચેની મિત્રતાને વધુ મજબૂત થશે. આજે મંગળવારે અને કાલે બુધવારે વિવિધ કાર્યક્રમોમાં ભાગ લેવા માટે આતુર છું.' વડાપ્રધાનની આ સાઉદી અરેબિયાની ત્રીજી મુલાકાત છે. આ પહેલા તેમણે 2016 અને 2019માં સાઉદી અરેબિયાની મુલાકાત લીધી હતી. આ પહેલા જેદ્દાહમાં વડાપ્રધાન નરેન્દ્ર મોદીના વિમાનના ઉતરાણ પહેલા સાઉદી હવાઈ ક્ષેત્રમાં એક અનોખો નજારો જોવા મળ્યો હતો. વડાપ્રધાન મોદીના વિમાનને રોયલ સાઉદી એરફોર્સના ફાઇટર જેટ્સ દ્વારા એસ્કોર્ટ કરવામાં આવ્યું હતું.

વિદેશ મંત્રાલયે 'X' પર પોસ્ટ કરીને લખ્યું હતું કે, મિત્રતા વધી રહી છે! વડાપ્રધાન નરેન્દ્ર મોદીની રાજ્ય મુલાકાતના પ્રસંગે એક ખાસ સંકેત તરીકે, તેમના વિમાનને સાઉદી હવાઈ ક્ષેત્રમાં પ્રવેશતા જ રોયલ સાઉદી એરફોર્સ દ્વારા એસ્કોર્ટ કરવામાં આવ્યું. પીએમ મોદીની ઐતિહાસિક શહેર જેદ્દાહની પ્રથમ મુલાકાત હશે, જ્યાં સ્ટ્રેટેજિક પાર્ટનરશિપ કાઉન્સિલ (SPC)ની બીજી બેઠકનું આયોજન કરવામાં આવ્યું છે. દ્વિપક્ષીય સંબંધોને વધુ આગળ વધારવા માટે ઓક્ટોબર 2019માં પીએમ મોદીની સાઉદી અરેબિયાની છેલ્લી રાજ્ય મુલાકાત દરમિયાન SPCની સ્થાપના કરવામાં આવી હતી. ભારતીય સમયના મુજબ સાંજે પીએમ મોદી ભારતીય સમુદાયના સભ્યો સાથે વાતચીત કરશે.

આજે મંગળવારે રવાના થતા પહેલા, પીએમ મોદીએ કહ્યું હતું કે, 'આજે હું ક્રાઉન પ્રિન્સ અને વડાપ્રધાન હિઝ હાઇનેસ પ્રિન્સ મોહમ્મદ બિન સલમાનના આમંત્રણ પર સાઉદી અરેબિયાની બે દિવસીય રાજકીય મુલાકાતે જઈ રહ્યો છું. ભારત સાઉદી અરેબિયા સાથેના તેના લાંબા ગાળાના અને ઐતિહાસિક સંબંધોને ખૂબ મહત્વ આપે છે, જેણે તાજેતરના વર્ષોમાં વ્યૂહાત્મક ઊંડાણ અને ગતિ મેળવી છે. સાથે મળીને આપણે સંરક્ષણ, વેપાર, રોકાણ, ઊર્જા અને લોકો-થી-લોકોના સંબંધોના ક્ષેત્રોમાં પરસ્પર ફાયદાકારક અને મજબૂત ભાગીદારી વિકસાવી છે.'

વડાપ્રધાન મોદીએ કહ્યું હતું કે, 'છેલ્લા દાયકામાં આ મારી સાઉદી અરેબિયાની ત્રીજી મુલાકાત હશે. જેમાં ઐતિહાસિક શહેર જેદ્દાહની પહેલી મુલાકાત હશે. હું સ્ટ્રેટેજિક પાર્ટનરશિપ કાઉન્સિલની બીજી બેઠકમાં હાજરી આપવા અને તેને મારા ભાઈ હિઝ હાઇનેસ પ્રિન્સ મોહમ્મદ બિન સલમાનની 2023માં ભારતની રાજ્ય મુલાકાત જેટલી જ સફળ બનાવવા માટે આતુર છું.' વડાપ્રધાન મોદીને 2016માં સાઉદી અરેબિયાના સર્વોચ્ચ નાગરિક સન્માનથી નવાજવામાં આવ્યા હતા.