સંયુક્ત રાષ્ટ્ર મહાસભાના 78મા સત્રના પ્રમુખ ડેનિસ ફ્રાન્સિસ ભારતની 5 દિવસની મુલાકાતે

ડેનિસ ફ્રાન્સિસ રાજ્યના અતિથિ તરીકે મહારાષ્ટ્રમાં ગણતંત્ર દિવસની પરેડમાં પણ હાજરી આપશે.

સંયુક્ત રાષ્ટ્ર મહાસભાના 78મા સત્રના પ્રમુખ ડેનિસ ફ્રાન્સિસ ભારતની 5 દિવસની મુલાકાતે આજે સવારે દિલ્હી પહોંચ્યા હતા. વિદેશ મંત્રાલયે કહ્યું છે કે; "તેમની મુલાકાત ભારત-યુએન સંબંધોને મજબૂત કરવાની અને ભારતની પ્રાથમિકતાઓ અને વૈશ્વિક પડકારો પર વિચારોની આપ-લે કરવાની તક છે."

મુલાકાત દરમિયાન, ફ્રાન્સિસ પરસ્પર હિતના વિવિધ બહુપક્ષીય મુદ્દાઓ પર કેન્દ્રીય વિદેશમંત્રી ડૉ. એસ. જયશંકર સાથે વાતચીત કરશે.

તેઓ સૌ પ્રથમ શાંતિ અને અહિંસાના દીવાદાંડી એવા મહાત્મા ગાંધીના સ્મારક રાજઘાટ પર શ્રદ્ધાંજલિ અર્પી હતી. તેમણે શ્રદ્ધાંજલિ આપવા માટે પુષ્પાંજલિ અર્પણ કરી અને ગાંધીજીની ભાવના અને શાંતિ અને દયાના વારસાને યાદ કર્યા. , તેમણે સંદેશ આપ્યો કે, "અહીં મહાત્મા ગાંધીની આધ્યાત્મિક હાજરી અનુભવવી એ એક અનોખો અનુભવ હતો. ઈતિહાસની સૌથી પરિવર્તનશીલ વ્યક્તિઓમાંની એક ગાંધીજીની ફિલસૂફી વિશ્વ માટે અને વ્યક્તિગત રીતે મારા માટે પ્રેરણાનો મહાન સ્ત્રોત છે." 

ફ્રાન્સિસ ડિજિટલ પબ્લિક ઇન્ફ્રાસ્ટ્રક્ચર પર રાઉન્ડ ટેબલમાં પણ હાજરી આપશે. તેઓ બુધવારે ઈન્ડિયા ગ્લોબલ કાઉન્સિલમાં બહુપક્ષીયવાદ, શાંતિ, સમૃદ્ધિ, પ્રગતિ અને ટકાઉપણું પર પ્રવચન પણ આપશે.

ડેનિસ ફ્રાન્સિસ જયપુર અને મુંબઈની પણ મુલાકાત લેશે. મુંબઈમાં તેઓ મુંબઈ આતંકી હુમલાના સ્મારક પર પુષ્પાંજલિ અર્પણ કરશે. બાદમાં તેઓ નેશનલ સ્ટોક એક્સચેન્જ ખાતે ઓબ્ઝર્વર રિસર્ચ ફાઉન્ડેશન ઈવેન્ટમાં બહુપક્ષીયતા પર તેમના મંતવ્યો રજૂ કરશે.

ડેનિસ ફ્રાન્સિસ રાજ્યના અતિથિ તરીકે મહારાષ્ટ્રમાં ગણતંત્ર દિવસની પરેડમાં પણ હાજરી આપશે.