આતંકવાદી હુમલા બાદ ભારતના વલણથી ગભરાયું પાકિસ્તાન, બોલાવી રાષ્ટ્રીય સુરક્ષા સમિતિની બેઠક

પહેલગામ આતંકવાદી હુમલાના પ્રતિભાવમાં પ્રધાનમંત્રી નરેન્દ્ર મોદીએ ઉચ્ચ સ્તરીય CCSની બેઠકની અધ્યક્ષતા કર્યાના થોડા કલાકો બાદ, પાકિસ્તાનના વડા પ્રધાન શાહબાઝ શરીફે રાષ્ટ્રીય સુરક્ષા સમિતિની બેઠક બોલાવી છે. આ બેઠકની જાહેરાત પાકિસ્તાનના નાયબ વડા પ્રધાન અને વિદેશ પ્રધાન ઈશાક ડારે સોશિયલ મીડિયા પ્લેટફોર્મ X પર કરી હતી, જેમાં તેમણે પુષ્ટિ આપી હતી કે રાષ્ટ્રીય સુરક્ષા ચર્ચાનો મુખ્ય વિષય રહેશે.

તેમણે લખ્યું, "ભારત સરકારના નિવેદનનો જવાબ આપવા માટે વડા પ્રધાન મોહમ્મદ શાહબાઝ શરીફે 24 એપ્રિલ, ગુરુવાર સવારે રાષ્ટ્રીય સુરક્ષા સમિતિની બેઠક બોલાવી છે."  કેનેડાએ બુધવારે કાશ્મીરના પહેલગામમાં થયેલા ભયાનક આતંકવાદી હુમલાની ઘટનાના લગભગ 36 કલાક પછી નિંદા કરી. કેનેડાના વડા પ્રધાન માર્ક કાર્નેએ સોશિયલ મીડિયા પ્લેટફોર્મ ટ્વિટર પર લખ્યું, "જમ્મુ અને કાશ્મીરમાં થયેલા આતંકવાદી હુમલાથી હું આઘાત પામ્યો છું. આ હિંસાનું એક અર્થહીન અને આઘાતજનક કૃત્ય છે જેમાં નિર્દોષ નાગરિકો અને પ્રવાસીઓ માર્યા ગયા છે અને ઘાયલ થયા છે. કેનેડા આ આતંકવાદી હુમલાની સખત નિંદા કરે છે. અમે પીડિતો અને તેમના પરિવારો પ્રત્યે સંવેદના વ્યક્ત કરીએ છીએ."

કેન્દ્ર સરકારે જમ્મુ અને કાશ્મીરના પહેલગામમાં થયેલા આતંકવાદી હુમલા અંગે 24 એપ્રિલે સર્વપક્ષીય બેઠક બોલાવવાનો નિર્ણય લીધો છે. સૂત્રોના જણાવ્યા અનુસાર, આ બેઠકની અધ્યક્ષતા સંરક્ષણ પ્રધાન રાજનાથ સિંહ કરશે. સર્વપક્ષીય બેઠકમાં હુમલા પછીની પરિસ્થિતિ, સુરક્ષા પગલાં અને ભવિષ્યની રણનીતિ પર ચર્ચા કરવામાં આવશે. જેમાં તમામ પક્ષોના નેતાઓ ભાગ લેશે.

પહેલગામમાં થયેલા આતંકવાદી હુમલાના એક દિવસ પછી, વડા પ્રધાન નરેન્દ્ર મોદીએ બુધવારે સુરક્ષા પરની કેબિનેટ સમિતિ (CCS) ની બેઠકની અધ્યક્ષતા કરી, જે બે કલાકથી વધુ સમય સુધી ચાલી. આ બેઠકમાં કેન્દ્રીય ગૃહમંત્રી અમિત શાહ, સંરક્ષણ મંત્રી રાજનાથ સિંહ અને વિદેશ મંત્રી એસ જયશંકર સહિત અન્ય અધિકારીઓ હાજર રહ્યા હતા.

પહેલગામ આતંકવાદી હુમલાને પગલે, પીએમ મોદીએ સાઉદી અરેબિયાની બે દિવસીય મુલાકાત ટૂંકી કરી અને બુધવારે સવારે દિલ્હી પરત ફર્યા. બેઠક બાદ વિદેશ સચિવ વિક્રમ મિશ્રીએ જણાવ્યું હતું કે, "આજે સાંજે પ્રધાનમંત્રીની અધ્યક્ષતામાં સુરક્ષા પર કેબિનેટ સમિતિ (CCS) ની બેઠક મળી હતી. CCS ને 22 એપ્રિલના રોજ પહેલગામમાં થયેલા આતંકવાદી હુમલા અંગે વિગતવાર માહિતી આપવામાં આવી હતી જેમાં 25 ભારતીયો અને એક નેપાળી નાગરિક માર્યા ગયા હતા. ઘણા લોકો ઘાયલ થયા હતા. CCS એ આ હુમલાની સખત નિંદા કરી હતી અને પીડિતોના પરિવારો પ્રત્યે ઊંડી સંવેદના વ્યક્ત કરી હતી અને ઘાયલોના ઝડપી સ્વસ્થ થવાની કામના કરી હતી."