જમ્મુ કાશ્મીર વિધાનસભામાં વિશેષ સત્ર દરમ્યાન હુમલાના મૃતકોને અપાઈ શ્રદ્ધાંજલિ, પહલગામ આતંકી હુમલા પર નિંદા પ્રસ્તાવ પસાર કરાયો

 પહેલગામ આતંકવાદી હુમલા બાદ સોમવારે જમ્મુ અને કાશ્મીર વિધાનસભાનું એક દિવસીય વિશેષ સત્ર બોલાવવામાં આવ્યું હતું. સોમવારે વિધાનસભાની કાર્યવાહી શરૂ થયા પછી, પહેલગામ આતંકવાદી હુમલામાં માર્યા ગયેલા લોકોને શ્રદ્ધાંજલિ આપવામાં આવી. આ દરમિયાન બે મિનિટનું મૌન પાળવામાં આવ્યું.

જમ્મુ અને કાશ્મીરના નાયબ મુખ્યમંત્રી સુરિન્દર કુમાર ચૌધરીએ સોમવારે મીડિયા સાથે વાત કરતા કહ્યું, "પહલગામમાં બનેલી ઘટના ખૂબ જ નિંદનીય છે અને અમે આ ઘટનાની નિંદા કરીએ છીએ. પાકિસ્તાને સમજવું પડશે કે તેમને 30-35 વર્ષમાં જમ્મુ અને કાશ્મીરમાંથી કંઈ મળ્યું નથી અને ભવિષ્યમાં પણ કંઈ મળશે નહીં. જોકે, જ્યાં સુધી પહલગામનો સવાલ છે, અમે દુઃખી અને અફસોસિત છીએ કે જમ્મુ અને કાશ્મીરના લોકો, અમારા મહેમાનો પર હુમલો કરવામાં આવ્યો અને તેઓ તેમાં મૃત્યુ પામ્યા."

પહેલગામ આતંકવાદી હુમલા અંગે કોંગ્રેસના ધારાસભ્ય ગુલામ અહેમદ મીરે કહ્યું, "આ હુમલા પછી, આખો દેશ એક થઈને આ હુમલાની નિંદા કરી રહ્યો છે. જમ્મુ અને કાશ્મીરના લોકો પણ આ હુમલાની નિંદા કરવા માટે મોટી સંખ્યામાં બહાર આવ્યા છે. આજે, ગૃહમાં એ જ અવાજ ગુંજી ઉઠશે કે જમ્મુ અને કાશ્મીરે આતંકવાદીઓ દ્વારા બનાવેલા એજન્ડાને હરાવવો પડશે અને તેનું પહેલું પગલું અહીં ભાઈચારો સ્થાપિત કરવાનું છે."

પહેલગામ આતંકવાદી હુમલા વિશે વાત કરતા, આરોગ્ય મંત્રી ડૉ. સકીના ઇટુએ કહ્યું, "દુઃખ વ્યક્ત કરવા માટે કોઈ શબ્દો પૂરતા નથી કારણ કે આવી ઘટનાઓ સમગ્ર માનવતાની છબીને કલંકિત કરે છે. આવી ઘટનાઓ ખૂબ જ ખોટી છે અને ક્યારેય ન થવી જોઈએ."

જમ્મુ અને કાશ્મીર પુનર્ગઠન અધિનિયમ, 2019 ની કલમ 18(1) હેઠળ પોતાની સત્તાનો ઉપયોગ કરીને લેફ્ટનન્ટ ગવર્નર મનોજ સિંહાએ આ આદેશ જારી કર્યો હતો.

"હું, મનોજ સિંહા, કેન્દ્રશાસિત પ્રદેશ જમ્મુ અને કાશ્મીરના લેફ્ટનન્ટ ગવર્નર, જમ્મુ અને કાશ્મીર પુનર્ગઠન અધિનિયમ, 2019 ની કલમ 18(1) હેઠળ મને મળેલી સત્તાઓનો ઉપયોગ કરીને, જમ્મુ અને કાશ્મીર વિધાનસભાને સોમવાર, 28 એપ્રિલના રોજ સવારે 10:30 વાગ્યે જમ્મુ ખાતે મળવા માટે બોલાવું છું," લેફ્ટનન્ટ ગવર્નર મનોજ સિંહાએ આદેશમાં જણાવ્યું હતું.

22 એપ્રિલે પહેલગામમાં થયેલા આતંકવાદી હુમલામાં ૨૬ લોકોએ જીવ ગુમાવ્યા હતા.