મહિલાઓ અને યુવાનોને સન્માન આપવા માટે પ્રધાનમંત્રી જન ધન યોજના સર્વોપરી રહી છેઃ PM Modi

PM Modi એ પ્રધાનમંત્રી જન ધન યોજનાની 10 મી વર્ષગાંઠ પૂર્ણ થવા પર ખુશી વ્યક્ત કરી

પ્રધાનમંત્રી જન ધન યોજનાની શરૂઆતને 10 વર્ષ પૂર્ણ થયા છે. PM Modi એ પ્રધાનમંત્રી જન ધન યોજનાની 10 મી વર્ષગાંઠ પૂર્ણ થવા પર ખુશી વ્યક્ત કરી. PM Modi એ સોશિયલ મીડિયા પ્લેટફોર્મ X પર એક પોસ્ટ શેર કરી અને લાભાર્થીઓને અભિનંદન પાઠવ્યા.

પોસ્ટ શેર કરતા પીએમ મોદીએ લખ્યું, “આજે આપણે એક મહત્વપૂર્ણ અવસરની ઉજવણી કરી રહ્યા છીએ. જન ધન યોજનાને 10 વર્ષ પૂર્ણ થયા. તમામ લાભાર્થીઓને અભિનંદન અને આ યોજનાને સફળ બનાવવા કામ કરનાર તમામ લોકોને અભિનંદન. જન ધન યોજના નાણાકીય સમાવેશને પ્રોત્સાહન આપવા અને કરોડો લોકોને, ખાસ કરીને મહિલાઓ, યુવાનો અને હાંસિયામાં ધકેલાઈ ગયેલા સમુદાયોને ગૌરવ અપાવવામાં સર્વોપરી રહી છે."

આ પહેલા 27 ઓગસ્ટે કેન્દ્રીય નાણામંત્રી નિર્મલા સીતારમણે પ્રધાનમંત્રી જન ધન યોજના વિશે માહિતી આપી હતી. તેમણે કહ્યું હતું કે છેલ્લા 10 વર્ષમાં ગરીબો માટે 53.13 કરોડ જનધન ખાતા ખોલવામાં આવ્યા છે. તેમાં 2.3 લાખ કરોડ રૂપિયા જમા છે. ચાલુ નાણાકીય વર્ષ દરમિયાન ત્રણ કરોડથી વધુ PMJDY ખાતા ખોલવાનું અમારું લક્ષ્ય છે.

વધુમાં તેમણે કહ્યું કે PMJDY એ વિશ્વની સૌથી મોટી નાણાકીય સમાવેશની પહેલ છે. માર્ચ 2015 માં ખાતા દીઠ સરેરાશ બેંક બેલેન્સ 1,065 રૂપિયા હતું, જે હવે વધીને 4,352 રૂપિયા થઈ ગયું છે. લગભગ 80 ટકા ખાતાઓ સક્રિય છે. ગ્રામીણ અને અર્ધ-શહેરી વિસ્તારોમાં 66.6 ટકા જન ધન ખાતા ખોલવામાં આવ્યા છે, જેમાંથી 29.56 કરોડ (55.6 ટકા) મહિલા ખાતાધારકો છે.

કેન્દ્ર સરકારની મહત્વકાંક્ષી યોજનાઓમાંની એક પ્રધાનમંત્રી જન ધન યોજના (PMJDY) એ 10 વર્ષ પૂર્ણ કર્યા છે. સરકારે આ યોજના 28 ઓગસ્ટ 2014ના રોજ શરૂ કરી હતી. જન ધન યોજના દ્વારા, સરકાર દેશના ગરીબ અને વંચિત વર્ગને બેંકિંગ સિસ્ટમ સાથે જોડવામાં સફળ રહી છે. આ સાથે, સામાજિક સુરક્ષા યોજનાઓનો લાભ ડાયરેક્ટ બેંક ટ્રાન્સફર એટલે કે DBT દ્વારા સીધા લાભાર્થીઓને પણ પહોંચાડવામાં આવી રહ્યો છે.