યુનેસ્કોના 'મેમોરી ઓફ ધ વર્લ્ડ રજિસ્ટર'માં ગીતા અને નાટ્યશાસ્ત્રનો સમાવેશ, PMએ કહ્યું, 'દરેક ભારતીય માટે ગર્વની ક્ષણ'

પ્રધાનમંત્રી નરેન્દ્ર મોદીએ યુનેસ્કોના 'મેમરી ઓફ ધ વર્લ્ડ રજિસ્ટરમાં 'શ્રીમદ ભગવદ ગીતા' અને ભરત મુનિના 'નાટ્ય શાસ્ત્ર'નો સમાવેશ થવા બદલ ખુશી વ્યક્ત કરી. તેમણે તેને દરેક ભારતીય માટે ગર્વની ક્ષણ ગણાવી. શુક્રવારે કેન્દ્રીય મંત્રી ગજેન્દ્ર સિંહ શેખાવતે સોશિયલ મીડિયા પ્લેટફોર્મ 'X' દ્વારા માહિતી આપી હતી કે 'ગીતા' અને 'નાટ્યશાસ્ત્ર'ને યુનેસ્કોના 'મેમરી ઓફ ધ વર્લ્ડ રજિસ્ટર'માં સમાવવામાં આવ્યા છે.

ગીતા અને નાટ્ય શાસ્ત્રે સદીઓથી સભ્યતા અને ચેતનાનું પોષણ કર્યું
કેન્દ્રીય મંત્રી શેખાવતની આ પોસ્ટનો જવાબ આપતા પીએમ મોદીએ લખ્યું, "વિશ્વભરના દરેક ભારતીય માટે ગર્વની ક્ષણ. યુનેસ્કોના 'મેમરી ઓફ ધ વર્લ્ડ રજિસ્ટર'માં ગીતા અને નાટ્ય શાસ્ત્રનો સમાવેશ આપણા શાશ્વત જ્ઞાન અને સમૃદ્ધ સંસ્કૃતિની વૈશ્વિક માન્યતા છે. ગીતા અને નાટ્ય શાસ્ત્રે સદીઓથી સભ્યતા અને ચેતનાને પોષી છે. તેમની આંતરદૃષ્ટિ વિશ્વને પ્રેરણા આપતી રહે છે."

ભારતના સભ્યતા વારસા માટે એક ઐતિહાસિક ક્ષણ
અગાઉ, કેન્દ્રીય મંત્રી ગજેન્દ્ર સિંહ શેખાવતે સોશિયલ મીડિયા પ્લેટફોર્મ X પર લખ્યું હતું કે, "ભારતના સભ્યતા વારસા માટે એક ઐતિહાસિક ક્ષણ. શ્રીમદ્ ભગવદ ગીતા અને ભરત મુનિના નાટ્યશાસ્ત્રને હવે યુનેસ્કોના 'મેમરી ઓફ ધ વર્લ્ડ રજિસ્ટરમાં' સામેલ કરવામાં આવ્યા છે. આ વૈશ્વિક સન્માન ભારતના શાશ્વત શાણપણ અને કલાત્મક પ્રતિભાની ઉજવણી કરે છે."

હવે આ આંતરરાષ્ટ્રીય રજિસ્ટરમાં દેશના 14 અભિલેખનો સમાવેશ
તેમણે આગળ લખ્યું, "આ રચનાઓ માત્ર સાહિત્યિક ખજાનાથી વધુ જ નહીં, તે દાર્શનિક અને સૌંદર્યલક્ષી સ્તંભો છે જેણે ભારતના વિશ્વ દૃષ્ટિકોણ અને આપણે જે રીતે વિચારીએ છીએ, અનુભવીએ છીએ, જીવીએ છીએ અને વ્યક્ત કરીએ છીએ તેને આકાર આપ્યો છે. આ સાથે, હવે આપણા દેશના 14 રેકોર્ડ આ આંતરરાષ્ટ્રીય રજિસ્ટરમાં સામેલ થયા છે."

મેમરી ઓફ ધ વર્લ્ડ રજિસ્ટર એ યુનેસ્કો દ્વારા શરૂ કરાયેલ એક કાર્યક્રમ
'મેમરી ઓફ ધ વર્લ્ડ રજિસ્ટર'એ યુનેસ્કો દ્વારા શરૂ કરાયેલ એક કાર્યક્રમ છે, જેનો ઉદ્દેશ્ય વિશ્વભરના મહત્વપૂર્ણ દસ્તાવેજી વારસાને સાચવવાનો છે. આ કાર્યક્રમ 1992માં શરૂ થયો હતો.