NCC કેડેટ્સે માઉન્ટ એવરેસ્ટ સર કર્યું, સંરક્ષણ પ્રધાન રાજનાથ સિંહે આપ્યો 10 લાખનો ચેક

નેશનલ કેડેટ કોર્પ્સ (NCC)ની એક યુવા પર્વતારોહણ ટીમે વિશ્વના સૌથી ઊંચા શિખર 'માઉન્ટ એવરેસ્ટ' પર સફળતાપૂર્વક ચઢાણ કર્યું છે. ગુરુવારે સંરક્ષણ પ્રધાન રાજનાથ સિંહે માઉન્ટ એવરેસ્ટ પર વિજય મેળવનાર નેશનલ કેડેટ કોર્પ્સ (NCC)ની આ ટીમનું સન્માન કર્યું.

આ પર્વતારોહણ ટીમમાં પાંચ યુવાનો અને 5 યુવતીઓનો સમાવેશ થાય છે. એક મહત્વપૂર્ણ વાત એ છે કે તેમની સરેરાશ ઉંમર માત્ર 19 વર્ષ છે. આટલી નાની ઉંમરે, આ કેડેટ્સે માઉન્ટ એવરેસ્ટ પર સફળતાપૂર્વક ચઢાણ કર્યું છે. આ અભિયાનમાં સૌથી નાની ઉંમરના કેડેટ માત્ર 16 વર્ષના હતા. આ અનોખી સિદ્ધિ બદલ સંરક્ષણ પ્રધાન રાજનાથ સિંહે ટીમને પ્રોત્સાહન રૂપે 10 ​​લાખ રૂપિયાનો ચેક અર્પણ કર્યો.

નવી દિલ્હીમાં આયોજિત એક કાર્યક્રમ દરમિયાન, NCC કેડેટ્સે સંરક્ષણ મંત્રી સાથે પોતાના અનુભવો શેર કર્યા. તેમણે જણાવ્યું કે કેવી રીતે કઠોર તાલીમ પ્રક્રિયા અને આયોજનને કાળજીપૂર્વક બનાવવામાં આવ્યું હતું. તેમણે કેવા પ્રકારના પડકારોનો સામનો કર્યો અને મુશ્કેલ પરિસ્થિતિઓ છતાં તેમણે કઈ હિંમત અને ધીરજ દાખવી.

સંરક્ષણ મંત્રીએ કહ્યું કે ટીમે શિસ્ત, ધૈર્ય, હિંમત અને સંયમની કસોટી પાર કરીને દેશનું ગૌરવ વધાર્યું છે. રાજનાથ સિંહે કેડેટ્સને યુવા પેઢી માટે પ્રેરણાસ્ત્રોત ગણાવ્યા. તેમણે કહ્યું કે આ અભિયાને સંદેશ આપ્યો છે કે દેશના યુવાનો વિશ્વના સૌથી ઊંચા શિખરને પણ જીતી શકે છે.

તેમણે વિશ્વાસ વ્યક્ત કર્યો કે આ કેડેટ્સ ભવિષ્યના પડકારોનો સામનો એ જ હિંમત અને દૃઢ નિશ્ચય સાથે કરશે. સંરક્ષણ મંત્રીએ NCCની ભૂમિકાની પ્રશંસા કરી, જેના દ્વારા કેડેટ્સને શારીરિક, માનસિક અને ભાવનાત્મક રીતે મજબૂત બનવાની સાથે સાથે તેમનામાં દેશભક્તિની ભાવના કેળવવાની અને સામાજિક કૌશલ્યો વિકસાવવાની તક મળે છે.

તેમણે આ અભિયાનમાં કેડેટ્સને સંપૂર્ણ સહયોગ આપનારા પરિવારોનો પણ આભાર માન્યો. આ પ્રસંગે NCCના ડિરેક્ટર જનરલ લેફ્ટનન્ટ જનરલ ગુરબીરપાલ સિંહ અને અન્ય મહાનુભાવો પણ હાજર રહ્યા હતા.