SC, ST અનામત મુદ્દે ભાજપના 100 સાંસદોએ PM મોદી સાથે મુલાકાત કરી

ભારતીય જનતા પાર્ટીના અનુસૂચિત જાતિ અને અનુસૂચિત જનજાતિ (SC/ST) ના લગભગ 100 સાંસદોએ શુક્રવારે સંસદ ભવનમાં પ્રધાનમંત્રી નરેન્દ્ર મોદી સાથે મુલાકાત કરી.

આ બેઠકનો હેતુ SC/ST ક્વોટામાં ક્રીમી લેયર લાગુ કરવા અંગે સુપ્રીમ કોર્ટ દ્વારા આપવામાં આવેલા નિર્ણયની ચર્ચા કરવાનો હતો. સાંસદોએ પ્રધાનમંત્રીને એક મેમોરેન્ડમ સુપરત કરીને માંગણી કરી હતી કે, આ નિર્ણયનો અમલ કરવામાં ન આવે.

સાંસદોએ સ્પષ્ટ કર્યું હતું કે, તેમનો વિરોધ પેટા-વર્ગીકરણ સામે નથી, પરંતુ SC/ST સમુદાય માટે ક્રીમી લેયરની જોગવાઈ સામે છે. પ્રધાનમંત્રી  નરેન્દ્ર મોદીએ સોશિયલ મીડિયા પ્લેટફોર્મ 'X' પર એક પોસ્ટ શેર કરીને આ બેઠક વિશે માહિતી આપી હતી અને ખાતરી આપી હતી કે SC/ST સમુદાય માટે ક્રીમી લેયરની જોગવાઈ લાગુ કરવામાં આવશે નહીં.

નોંધનીય છે કે, સુપ્રીમ કોર્ટે ગયા અઠવાડિયે એસસી/એસટી કેટેગરીના ક્વોટામાં પેટા-વર્ગીકરણને મંજૂરી આપી હતી. કોર્ટે કહ્યું હતું કે, એસસી/એસટી કેટેગરીમાં નવી પેટા-શ્રેણીઓ બનાવી શકાય છે અને આ અંતર્ગત અત્યંત પછાત વર્ગોને અલગથી અનામત આપી શકાય છે. સુપ્રીમ કોર્ટે એમ પણ કહ્યું હતું કે, રાજ્ય સરકારો ક્વોટાની અંદર ક્વોટાને મંજૂરી આપી શકે છે, પરંતુ તેમણે ખાતરી કરવી પડશે કે આ નિર્ણય રાજકીય મહત્વાકાંક્ષાઓના આધારે લેવામાં ન આવે. જો આવું થાય, તો નિર્ણય ન્યાયિક સમીક્ષાને પાત્ર હોઈ શકે છે.

સુપ્રીમ કોર્ટે કહ્યું હતું કે, જો રાજ્ય સરકાર ક્વોટાની અંદર કોઈપણ જાતિને ક્વોટા આપે છે, તો તે રાજ્ય સરકારે સાબિત કરવું પડશે કે તે પછાતતાના આધારે કરવામાં આવ્યું છે. એ પણ સુનિશ્ચિત કરવું જોઈએ કે SC/ST માટે કુલ અનામતના 100 ટકા કોઈ એક વર્ગને આપવામાં ન આવે.

પ્રધાનમંત્રી સાથેની બેઠકમાં ભાગ લેનારા સાંસદોએ ભારપૂર્વક જણાવ્યું હતું કે, SC/ST સમુદાય માટે અનામતનો હેતુ સામાજિક અને આર્થિક પછાતતાને દૂર કરવાનો છે. જો ક્રીમી લેયરની જોગવાઈ લાગુ કરવામાં આવે તો જેઓ હજુ પણ સમાજના હાંસિયામાં છે તેમને નુકસાન થશે. સાંસદોએ એ વાત પર પણ ભાર મૂક્યો કે SC/ST સમુદાય માટે અનામતનો ઉપયોગ તેમની સામાજિક અને આર્થિક સ્થિતિ સુધારવા માટે થવો જોઈએ અને તેમને વધુ વિભાજિત કરવા માટે નહીં.

આ મીટિંગ પછી, પ્રધાનમંત્રીએ SC/ST સમુદાયના હિતોની સુરક્ષા માટે તેમની પ્રતિબદ્ધતા વ્યક્ત કરી અને ખાતરી આપી હતી કે તેમની સરકાર આ મુદ્દા પર ધ્યાન આપશે. તેમણે કહ્યું કે, સરકાર SC/ST સમુદાયની સાથે છે અને તેમના અધિકારોની સુરક્ષા માટે તમામ શક્ય પગલાં લેશે. આ ખાતરીને સાંસદો અને એસસી/એસટી સમુદાય માટે એક મહત્વપૂર્ણ પગલું માનવામાં આવી રહ્યું છે, જે તેમના હિતોના રક્ષણની દિશામાં પ્રગતિનો સંકેત છે.