રાજકોટમાં કેન્સર ક્લબ દ્વારા ફેશન શૉ ફોર કેન્સર વોરિયર્સનું આયોજન કરાયું 

સરવાઇકલ કેન્સર, બ્રેસ્ટ કેન્સર સહિતના વિવિધ કેન્સરની જાગૃતતા માટે કરવામાં આવ્યું આયોજન 

રાજકોટમાં સૌ પ્રથમવાર કેન્સર વોરિયર્સના લાભાર્થે ફેશન શો યોજાયો. જ્યારે કોઇપણ વ્યક્તિ કેન્સર થયાનું નિદાન સાંભળે ત્યારે ચિંતિત બની જાય. ક્યારેક હતાશામાં ગરકાવ થઇ જાય. આવી પરિસ્થિતિમાં દર્દીઓને 'કેન્સર એટલે કેન્સલ નહીં'ની પ્રેરણા આપવા રાજકોટમાં ફેશન શો યોજાયો હતો. સયાજી હોટેલ ખાતે દાતાના સહકારથી કેન્સર ક્લબ દ્વારા આયોજિત આ ફેશન શોનો મુખ્ય ઉદ્દેશ કેન્સર જેવા ગંભીર રોગ અને તેની સારવાર વિશે જાગૃતિ ફેલાવવાનો તથા લોકોમાં કેન્સરગ્રસ્તો માટે હકારાત્મક અભિગમ કેળવવાનો હતો.

આ ફેશન શોમાં કેન્સરની સારવાર ચાલી રહી હોય તેવા અને રોગમાંથી સ્વસ્થ થયેલા કુલ 75 વીરાંગના મહિલાઓએ  ભાગ લીધો હતો. જેમાં 18 વર્ષની યુવતીથી માંડી 80 વર્ષના વૃધ્ધાઓએ ટ્રેડીશનલ, ઈન્ડોવેસ્ટર્ન અને વેસ્ટર્ન કોસચ્યુમની થીમ આધારિત મક્કમ મનોબળ સાથે રેમ્પ વોક કર્યું હતું. આ તકે  આયોજક જ્યોતિ શાસ્ત્રી એ જણાવ્યું હતું કે ગુજરાતમાં આયોજિત આ સૌથી મોટા ફેશન શોનો લિમ્કા બૂક ઓફ રેકોર્ડ અને ઇન્ડિયા બૂક ઓફ રેકોર્ડમાં સમાવેશ કરવા માટેની કાર્યવાહી કરાશે.ધારાસભ્ય રમેશભાઈ ટીલાળા, જિલ્લા કલેક્ટર પ્રભવ જોશી, કેન્સર ક્લબના સ્થાપક અશ્વિન સોલંકી સહિત ના આ તકે ખાસ ઉપસ્થિત રહ્યા હતા.