આજે ચેપોક ખાતે ચેન્નાઈ સુપર કિંગ્સ અને દિલ્હી કેપિટલ્સ વચ્ચે યોજાશે મેચ

IPL 2025ની 17મી મેચ આજે ચેપોક મેદાન પર ચેન્નાઈ સુપર કિંગ્સ (CSK)અને દિલ્હી કેપિટલ્સ (DC)વચ્ચે રમાશે. ભારતીય સમય મુજબ આ મેચ બપોરે 3.30 વાગ્યે શરૂ થશે. ચેપોક મેદાન પર ચેન્નાઈ સુપર કિંગ્સ માટે આ મેચ ખૂબ જ મહત્વપૂર્ણ છે. અગાઉની બંને મેચ હાર્યા બાદ CSK પોઈન્ટ ટેબલમાં નીચે સરકી ગયું છે અને આ મેચ તેમના માટે ખૂબ જ મહત્વપૂર્ણ છે.

છેલ્લી બે મેચ જીત્યા બાદ દિલ્હી આત્મવિશ્વાસથી ભરપૂર છે અને તે ચોક્કસપણે પોતાની જીતનો સિલસિલો જાળવી રાખવાના ઇરાદા સાથે મેદાને ઉતરશે. ચેપોક ખાતે CSKનો RCB સામેનો પાછલી મેચ 50 રનથી હાર્યું હતું. પ્રથમ બેટિંગ કરતા, RCBએ 7 વિકેટ ગુમાવીને 196 રન બનાવ્યા. લક્ષ્યનો પીછો કરતા CSK ફક્ત 146 રન જ બનાવી શક્યું. RCB એ 17 વર્ષ પછી CSKને તેમના ઘર આંગણે હરાવ્યું.

ટુર્નામેન્ટમાં પોઈન્ટ ટેબલની વાત કરીએ તો, દિલ્હી ચાર પોઈન્ટ સાથે બીજા સ્થાને છે. જ્યારે, ચેન્નાઈ 7મા સ્થાને છે. IPLમાં બંને ટીમો વચ્ચે અત્યાર સુધીમાં કુલ 30 મેચ રમાઈ છે. સીએસકેએ દિલ્હી પર 19 વખત જીત મેળવી છે. તે જ સમયે, દિલ્હી 11 વખત જીતવામાં સફળ રહ્યું છે. ચેપોક મેદાન પર CSK અને દિલ્હી 9 વખત એકબીજા સામે ટકરાયા છે. અહીં પણ CSK એ દિલ્હી પર પ્રભુત્વ જમાવ્યું છે. સીએસકેએ સાત મેચમાં દિલ્હીને હરાવ્યું છે.

આંકડાઓની દ્રષ્ટિએ ભલે CSK દિલ્હી કરતાં વધુ મજબૂત દેખાતું હોય, પણ આ વર્ષે અક્ષર પટેલની કેપ્ટનશીપમાં દિલ્હી કેપિટલ્સ નવી ઉર્જા સાથે મેદાનમાં ઉતરી રહ્યું છે. તે જ સમયે, CSK તેની નબળી બેટિંગ અને બોલિંગને કારણે તેની છેલ્લી બંને મેચ હારી ગયું છે. 

કેપ્ટન ઋતુરાજ ગાયકવાડનું બેટ પણ કામ કરી રહ્યું નથી. રાહુલ ત્રિપાઠી પણ ઓપનિંગ બેટ્સમેન તરીકે કંઈ ખાસ કરી શક્યા નથી. એમએસ ધોની બેટિંગ ક્રમમાં એટલો નીચે આવી રહ્યો છે કે તેનો સીએસકેને કોઈ ફાયદો થઈ રહ્યો નથી. શિવમ દુબેનું બેટ પણ શાંત છે. બોલિંગમાં, નૂર અહેમદ, મથીશા પથિરાના, ખલીલ અહેમદ સારી બોલિંગ કરી રહ્યા છે પરંતુ ઘણા બધા રન આપી રહ્યા છે.

દિલ્હી કેપિટલ્સ માટે, ઓપનર જેક ફ્રેઝર-મેકગર્ક, ફાફ ડુ પ્લેસિસ ટીમને સારી શરૂઆત આપી રહ્યા છે. મિડલ ઓર્ડરમાં, અક્ષર પટેલ કેપ્ટનશીપની ઈનિંગ્સ રમવા માટે તૈયાર છે. આ ઉપરાંત, ટ્રિસ્ટન સ્ટબ્સ ટીમને ફિનિશિંગ ટચ આપવામાં પણ નિષ્ણાત છે. મિશેલ સ્ટાર્ક, કુલદીપ યાદવ અને મોહિત શર્મા પોતાની શિસ્તબદ્ધ બોલિંગથી વિરોધી ટીમને મોટો સ્કોર કરતા રોકવામાં સફળ રહ્યાં છે.