મહેસાણા ખેડૂત તાલીમ કેન્દ્રમાં કેસર મહોત્સવ 2023નું આયોજન કરાયું

મહેસાણા જિલ્લામાં ઉનાળાની સીઝન દરમિયાન કેરીના રસિકોને ચાલુ વર્ષે પ્રાકૃતિક કેસર કેરીની લિજ્જત માણવા મળે તે માટે જિલ્લા વહીવટી તંત્રના સહયોગથી ખેડૂત તાલીમ કેન્દ્રમાં કેસર મહોત્સવ 2023નું આયોજન કરાયું હતું. આ મહોત્સવ દરમિયાન તલાલા ગીરની પ્રાકૃતિક રીતે ઉત્પાદન થયેલી કેરી લઈ ખેડૂતો મહેસાણા આવી પહોંચ્યા હતા. ખેડૂતોને પોતાની કેરીનું સીધું જ ગ્રાહકો સુધી વેચાણ કરવા મળે માટે એક માધ્યમ મળ્યું હતું. જેને પગલે માત્ર 10 દિવસમાં 16 ટન પ્રાકૃતિક કેસર કેરીનું કેસર મહોત્સવમાં વેચાણ કરવામાં આવ્યું છે. 

આ મહોત્સવમાં પ્રમાણિત કરેલ જીઆઈ ટેગ 185 વાળી કેસર કેરીનું વેચાણ કરવામાં આવતા ગ્રાહકોને કેમિકલ કે કાર્બન વગરની શુદ્ધ પ્રાકૃતિક કેરી ઘર આંગણે જ મળી રહી છે. તેમજ ખેડૂતોને પણ વચ્ચે કોઈ વચેટિયા ન હોવાથી આવકમાં વધારો થઈ રહ્યો છે. આ મહોત્સવમાં ગીરની કેસર કેરીના રોપાનું વિતરણ કરવામાં આવતા મોટી સંખ્યામાં રોપાની માંગ પણ ઉઠવા પામી છે.