આજથી કેવડિયામાં બે દિવસીય રાષ્ટ્રિય કક્ષાની ઉર્જા કોન્ફરન્સ

દેશના તમામ રાજ્યો-કેન્દ્ર શાસિત રાજ્યોના ઉર્જા મંત્રીઓ-સચિવો, વીજ કંપનીઓ, વીજ વિતરણ કરતી કંપનીઓના એમડી-ચેરમેનો સહિતના મહાનુભાવોની ઉપસ્થિતિમાં ઉર્જા ક્ષેત્રના પડકારો, કાર્ય-પધ્ધતિ, સિધ્ધિઓ, નવા ક્ષેત્રોમાં પ્રવેશ સહિતની બાબતો અંગે પરામર્શ કરીને એક રોડમેપ તૈયાર કરાશે

ભારત સરકારના ઉર્જા અને બિન પરંપરાગત ઉર્જા મંત્રાલયની સાથે ગુજરાતના ઉર્જા વિભાગના સંયુક્ત ઉપક્રમે, ગુજરાતના કેવડિયા ખાતે આજથી બે દિવસીય આંતરરાષ્ટ્રિય કક્ષાની કોન્ફરન્સ શરૂ થવા જઈ રહી છે.. જેને કેન્દ્રીય ઉર્જા મંત્રી આર.કે.સિંગના હસ્તે ખુલ્લી મૂકાશે.  આ કોન્ફરન્સમાં દેશભરના તમામ રાજ્યોના ઉર્જા મંત્રીઓ, ઉર્જા સચિવો, કેન્દ્ર શાસિત પ્રદેશના મંત્રીઓ-સચિવો, વીજ-વિતરણ કંપનીઓના ચેરમેનો પણ ખાસ ઉપસ્થિત રહેશે. આ કોન્ફરન્સમાં ઉર્જાના નવા ક્ષેત્રો બાબતે ખાસ ચર્ચા કરીને એક રોડમેપ તૈયાર કરાશે. ગુજરાતના ઉર્જા મંત્રી સૌરભ પટેલે આ બાબતે માહિતી આપતાં કહ્યું હતું કે, ૧૧મી, ઓકટોબરે, ભારતના ઉર્જા મંત્રી આર.કે.સિંગ, આ કોન્ફરન્સને ખુલ્લી મૂકશે. જેમાં ઉર્જા વિતરણ કરતી એનટીપીસી, પાવર ગ્રીડ કોર્પોરેશન ઓફ ઈન્ડિયાસ પીએફસી, આર.ઈ.સી. અમે એચપીસી જેવી વિવિધ કંપનીઓના મેનેજીંગ ડિરેકટર્સ, ચેરમેનો ખાસ ઉપસ્થિત રહેવાના છે. આ બે દિવસિય કોન્ફરન્સના પ્રથમ દિવસે પુન:પ્રાપ્ય ઉર્જા (રીન્યુએબલ એનર્જી), પ્રધાનમંત્રી કુસુમ યોજનાના અમલીકરણ, સોલાર રુફટોપ, સરહદી વિસ્તારોમાં રીન્યુએબલ એનર્જીના વિકાસના કાર્યક્રમો, અલ્ટ્રા મેગા રીન્યુએબલ એનર્જી પાર્ક્સની સ્થાપના સંદર્ભે, ઈઝ ઓફ ડુંઈગ બિઝનેશ અંતર્ગત સોલાર અને વિન્ડ પાવર બાબતે હાથ ધરાનારા વિવિધ પ્રોજેક્ટ્સ અંગે જમીનની ફાળવણી સહિતના આનુસાંગિક કામો તથા રેગ્યુલેટરી ઈશ્યુને લઈને પણ વિગતવાર ચર્ચા હાથ ધરાશે. જ્યારે કોન્ફરન્સના બીજા દિવસે, ગુજરાતે છેલ્લા ૧૦ વર્ષમાં ઉર્જાના તમામ ક્ષેત્રોમાં દેશમાં જે રીતે નંબર-૧નું સ્થાન પ્રાપ્ત કર્યું છે. તે સંદર્ભે વિવિધ રાજ્યોને માહિતગાર કરાશે. આ માટે પ્રેઝેન્ટેશન રજૂ કરાશે અને તેના દ્વારા ઉપસ્થિત મહાનુભાવોને, ઉર્જાના ક્ષેત્રમાં ગુજરાતે પ્રાપ્ત કરેલી સિધ્ધિઓ અંગે સમજ અપાશે.ગુજરાતે જ્યોતિગ્રામ યોજનાના માધ્યમ દ્વારા તમામ ગામડાઓમાં ૨૪ કલાક ગુણવત્તાયુક્ત વીજળી પૂરી પાડીને દેશને જે રોલ મોડેલ પૂરું પાડ્યું છે. તેવી જ રીતે દેશના અન્યા રાજ્યો પણ ગામડાઓમાં ૨૪ કલાક વીજળી આપે તે માટે ખાસ વિચાર-વિમર્શ કરાશે. આ ઉપરાંત ટ્રાન્સમિશન, થર્મલ, એનર્જી ક્નઝર્વેશન, ઈન્ફોર્મેશન ટેકનોલોજી સહિતના વિષયો ઉપર પણ ચર્ચા-વિચારણા કરાશે.