સુરેન્દ્રનગરમાં ખગ્રાસ ચંદ્રગ્રહણ નિહાળવાનું આયોજન નિષ્ફળ, વિદ્યાર્થીઓએ લાઇવ ટેલિકાસ્ટ દ્વારા ઘટના માણી

સુરેન્દ્રનગરમાં ખગ્રાસ ચંદ્રગ્રહણ નિહાળવાનું આયોજન નિષ્ફળ, વિદ્યાર્થીઓએ લાઇવ ટેલિકાસ્ટ દ્વારા ઘટના માણી

રવિવારે, 7 સપ્ટેમ્બરના રોજ ભાદરવી પૂનમની રાત્રે આકાશમાં જોવા મળનાર ખગોળીય ઘટના 'બ્લડ મૂન' એટલે કે ખગ્રાસ ચંદ્રગ્રહણ નિહાળવા માટે સુરેન્દ્રનગરના વિદ્યાર્થીઓ અને શિક્ષકો મોટી સંખ્યામાં ડો. હોમીભાલા જિલ્લા લોક વિજ્ઞાન કેન્દ્ર ખાતે એકત્ર થયા હતા. જોકે, વાતાવરણ વરસાદી હોવાને કારણે અહીં ટેલિસ્કોપ દ્વારા ગ્રહણ જોવાનું શક્ય બન્યું નહોતું, જેના કારણે લોકોને નિરાશા સાંપડી હતી. પરંતુ, રાજ્યના અન્ય જિલ્લાઓમાંથી ચંદ્રગ્રહણનું લાઇવ ટેલિકાસ્ટ દર્શાવીને વિદ્યાર્થીઓને આ ખગોળીય ઘટના નિહાળવાની તક પૂરી પાડવામાં આવી હતી.

ખગ્રાસ ચંદ્રગ્રહણ: વૈજ્ઞાનિક સમજ અને માન્યતાઓ

ડૉ. હોમીભાલા જિલ્લા લોક વિજ્ઞાન કેન્દ્રના ડાયરેક્ટર ઘનશ્યામભાઈ મહેતાએ જણાવ્યું હતું કે, “સુરેન્દ્રનગર ખાતે ચંદ્રગ્રહણ રાત્રે 9:57 વાગ્યે શરૂ થયું હતું અને તે કુલ 3 કલાક 28 મિનિટ સુધી ચાલ્યું હતું. આમાંથી 82 મિનિટ પૂર્ણ ચંદ્રગ્રહણનો સમય હતો. આ દરમિયાન, પૃથ્વી સૂર્ય અને ચંદ્રની વચ્ચે આવી ગઈ હતી, જેના કારણે પૃથ્વીનો પડછાયો ચંદ્ર પર પડ્યો હતો અને ચંદ્ર લાલ-નારંગી રંગનો દેખાયો હતો, જેને બ્લડ મૂન કહેવામાં આવે છે.” તેમણે ઉમેર્યું હતું કે 27 જુલાઈ, 2018 પછી આ પહેલીવાર હતું જ્યારે દેશના તમામ ભાગોમાંથી આ ગ્રહણ જોવા મળ્યું હતું અને તેને ખુલ્લી આંખે પણ જોઈ શકાતું હતું. જોકે, દૂરબીન કે ટેલિસ્કોપ દ્વારા જોવાથી તે વધુ સ્પષ્ટ રીતે દેખાય છે.

ખગોળીય ઘટના વિશે વૈજ્ઞાનિક અભિગમ અપનાવવા પર ભાર

સામાન્ય રીતે, આપણા હિન્દુ ધર્મ અને જ્યોતિષશાસ્ત્ર અનુસાર ગ્રહણ દરમિયાન ખાવા-પીવા કે રસોઈ બનાવવાની મનાઈ હોય છે. પરંતુ વિદ્યાર્થીઓ અને શિક્ષકોએ આ ઘટનાને માત્ર એક વૈજ્ઞાનિક પ્રક્રિયા તરીકે સમજવા પર ભાર મૂક્યો.

સુરેન્દ્રનગરના મિકેનિકલના વિદ્યાર્થી સંદીપભાઈ મહેતાએ જણાવ્યું કે, “આ એક ખગોળીય ઘટના છે, અને તેની સાથે જોડાયેલી ખોટી માન્યતાઓ દૂર કરવી જરૂરી છે.”

એમ.પી. શાહ એન્ડ સાયન્સ કોલેજના પ્રોફેસર જીગ્નેશકુમાર બારોટે પણ આ ઘટનાને એક વૈજ્ઞાનિક ઘટના ગણાવીને વિદ્યાર્થીઓને આ વિશે સમજણ આપી હતી.

આ ગ્રહણ ભારત, એશિયા, પશ્ચિમ ઓસ્ટ્રેલિયા અને યુરોપ સહિત વિશ્વના ઘણા ભાગોમાં દેખાયું હતું. નિષ્ણાતોના મતે, એશિયા અને ઓસ્ટ્રેલિયાના લોકોએ સૌથી અદભુત દ્રશ્ય નિહાળ્યું હતું, કારણ કે ગ્રહણ સમયે ચંદ્ર આકાશમાં ઊંચો હતો. લોકોએ ચંદ્રોદય દરમિયાન પણ થોડા સમય માટે આ અદ્ભુત ઘટનાના સાક્ષી બન્યા હતા.