CM રૂપાણીએ વડતાલ ખાતે ભારતીય પત્રકાર સંઘ સેશનને ખૂલ્લું મૂક્યું 

મુખ્યમંત્રી વિજયભાઈ રૂપાણીએ સ્વામિનારાયણ સંપ્રદાયની રાજધાની એવા પ્રસિદ્ધ સ્વામિનારાયણ તીર્થધામ વડતાલ ખાતે ભારતીય પત્રકાર સંઘ, નવી દિલ્હી આયોજિત નવમા ત્રિદિવસીય પ્લેનરી સેશનને ખુલ્લું મૂકયું હતું. 

આ પ્રસંગે મુખ્યમંત્રીએ જણાવ્યું હતું કે લોકતંત્રના ચાર સ્તંભમાં મિડીયાની ભૂમિકા મહત્વની છે ત્યારે તેણે પક્ષકાર ન બનતાં જનતા જનાર્દનનો અવાજ-મત નીરક્ષીર વિવેકથી સાચી રીતે રજૂ કરવાનું દાયિત્વ નિભાવવું જોઇએ. આ અવસરે મુખ્યમંત્રીએ પત્રકારત્વ સહિત વિવિધ ક્ષેત્રોમાં વિશિષ્ટ કામગીરી કરનાર પત્રકારો અને વ્યક્તિ વિશેષોને સન્માનપત્ર અર્પણ કરી સન્માન કર્યું હતું. 

આ કાર્યક્રમમાં ગુજરાત સહિત દેશભરના ૪૦૦ પત્રકારો ભાગ લઇ રહયાં છે. આ અવસરે વડતાલ મંદિર દ્વારા સુરત અગ્નિકાંડના મૃતકોને સહાયરૂપ થવા રૂપિયા સાડા પાંચ લાખનો ચેક સંતોએ મુખ્યમંત્રીને ''મુખ્યમંત્રી રાહતનિધિ ફંડ''માં અર્પણ કર્યો હતો.