વિશ્વને કોરોના મુક્ત કરવા બ્રિટનમાં દુનિયાનું સૌથી મોટું દવાનું માનવ પરીક્ષણ શરૂ

કોરોના વાઈરસના કેરથી ઝઝૂમી રહેલી દુનિયાને મુક્ત કરવા માટે ગુરૂવારથી બ્રિટનમાં દુનિયાનું સૌથી મોટું દવાનું માનવ પરીક્ષણ શરૂ થયું છે. બ્રિટનમાં તેજ ગતિથી શરૂ થયેલ આ માનવ પરિક્ષણ પર સમગ્ર વિશ્વની નજર મંડાયેલી છે. વૈજ્ઞાનિકોએ આ પરિક્ષણમાં 80 ટકા સફળતા વ્યક્ત કરી છે. બ્રિટનમાં 165 હોસ્પિટલોમાં આશરે 5 હજાર દર્દીઓને એક મહિના સુધી તેમજ યુરોપ અને અમેરિકામાં પણ અસંખ્ય લોકો પર આજ રીતે પરીક્ષણ કરાશે. 

આ મામલે ઓક્સફોર્ડ યુનિવર્સિટીના સંક્રામક રોગ વિભાગના પ્રોફેસર પીટર હાર્ડવીએ જણાવ્યું હતું કે, આ દુનિયાનું સૌથી મોટું, માનવ પરીક્ષણ છે. મહત્વપૂર્ણ છે કે, પ્રોફેસર હાર્ડવી આ પહેલા ઈબોલાની દવાનું પરીક્ષણ કરવાનું નેતૃત્વ કરી ચુક્યાં છે. બ્રિટનમાં અત્યાર સુધીમાં 18 હજાર 791 લોકોનાં મોત થયાં છે અને આશરે 1 લાખ 40 હજારથી વધુ લોકો સંક્રમિત છે.