'સારે જહાં સે અચ્છા હિન્દુસ્તાન હમારા' ગીત પેરિસમાં ગુંજ્યું

PM મોદી ગુરુવારે સવારે ફ્રાન્સ અને UAE જવા રવાના થયા હતા. અગાઉ તેણે કહ્યું હતું કે આ મુલાકાત તેના માટે ખૂબ જ ખાસ છે. PM મોદી ફ્રાન્સના રાષ્ટ્રપતિ ઈમેન્યુઅલ મેક્રોન સાથે રાષ્ટ્રીય દિવસની ઉજવણીમાં હાજરી આપશે.
પ્રધાનમંત્રી મોદીએ જણાવ્યું હતું કે, આ મુલાકાત ખાસ કરીને વિશેષ છે, કારણકે તેઓ પેરિસમાં ફ્રેન્ચ રાષ્ટ્રીય દિવસ અથવા બેસ્ટિલ ડે ઉજવણીના અતિથિ તરીકે રાષ્ટ્રપતિ મેક્રોન સાથે જોડાશે. ભારતીય ત્રિ-સેવાઓની ટુકડીઓ બેસ્ટિલ ડે પરેડનો ભાગ હશે. જ્યારે ભારતીય વાયુસેનાના વિમાન આ પ્રસંગે ફ્લાય-પાસ્ટ કરશે.

પ્રધાનમંત્રીએ વધુમાં કહ્યું કે આ વર્ષે અમારી વ્યૂહાત્મક ભાગીદારીની 25મી વર્ષગાંઠ છે. ઊંડો વિશ્વાસ અને પ્રતિબદ્ધતાના મૂળમાં રહેલા અમારા બંને દેશો સંરક્ષણ, અવકાશ, નાગરિક પરમાણુ, વાદળી અર્થવ્યવસ્થા, વેપાર, રોકાણ, શિક્ષણ, સંસ્કૃતિ અને લોકો વચ્ચેના સંબંધો સહિત વિવિધ ક્ષેત્રોમાં નજીકથી સહયોગ કરે છે. અમે પ્રાદેશિક અને વૈશ્વિક મુદ્દાઓ પર પણ સાથે મળીને કામ કરીએ છીએ.

પીએમ મોદીએ કહ્યું કે, તેઓ રાષ્ટ્રપતિ મેક્રોન સાથે મુલાકાત કરવા અને આગામી 25 વર્ષોમાં આ લાંબા સમયની અને સમય-પરીક્ષણ ભાગીદારીને આગળ વધારવા માટે વ્યાપક ચર્ચા કરવા માટે ઉત્સુક છે. 2022ની મુલાકાતનો ઉલ્લેખ કરતા PMએ કહ્યું કે, ફ્રાન્સની મારી છેલ્લી સત્તાવાર મુલાકાતથી, મને ઘણી વખત રાષ્ટ્રપતિ મેક્રોનને મળવાની તક મળી છે. આ દરમિયાન પીએમ મોદી ભારતીય સમુદાય, બંને દેશોના અગ્રણી CEO તેમજ અગ્રણી ફ્રેન્ચ હસ્તીઓ સાથે પણ મુલાકાત કરશે. તેમણે વિશ્વાસ વ્યક્ત કર્યો હતો કે તેમની મુલાકાત બંને દેશો વચ્ચે વ્યૂહાત્મક ભાગીદારીને નવી ગતિ આપશે.

બીજી તરફ ફ્રાંસની રાજધાની પેરિસમાં 14મી જુલાઈએ યોજાનારી બેસ્ટિલ ડે પરેડના રિહર્સલ દરમિયાન 'સારે જહાં સે અચ્છા હિન્દુસ્તાન હમારા'ના નાદ પણ ગુંજી ઉઠ્યા હતા. આ પરેડમાં ભારતીય સેના, નેવી અને એરફોર્સની ટીમો પણ માર્ચ કરશે. બુધવારે યોજાયેલા રિહર્સલમાં ભારતની ત્રણેય સેનાઓના વરિષ્ઠ અધિકારીઓએ ભાગ લીધો હતો. પરેડ દરમિયાન ભારતના પીએમ મોદી પણ મુખ્ય અતિથિ તરીકે હાજર રહેશે.

ફ્રાન્સની સેના પણ ભારતીય પ્રધાનમંત્રીના મુખ્ય આતિથ્યને લઈને ઉત્સાહિત છે. ફ્રેન્ચ વાયુસેનાના કર્નલ થિયરીએ કહ્યું કે, જ્યારે ફ્રાન્સના સૈનિકો બેસ્ટિલ ડે પરેડ પર કૂચ કરી હશે ત્યારે તેઓ ભારતના પ્રધાનમંત્રી અને ફ્રાન્સના રાષ્ટ્રપતિને તેઓને જોશે. તે ખૂબ જ ભાવનાત્મક ક્ષણ હશે કારણ કે, સૈનિકો તેમનાથી લગભગ 30 મીટર જ દૂર હશે. આ પરેડમાં ભારત તરફથી આર્મી, નેવી અને એરફોર્સની ટીમો પણ ભાગ લેશે.