ગૃહમંત્રી અમિત શાહ આજે 'સીમાંત જિલ્લા પોલીસ અધિક્ષક સંમેલન 2026'ને સંબોધશે

ગૃહમંત્રી અમિત શાહ આજે 'સીમાંત જિલ્લા પોલીસ અધિક્ષક સંમેલન 2026'ને સંબોધશે

દેશની આંતરરાષ્ટ્રીય સરહદોની સુરક્ષા વ્યવસ્થાને વધુ અભેદ્ય અને મજબૂત બનાવવાના ઉદ્દેશ્ય સાથે આજે નવી દિલ્હીમાં એક મહત્વપૂર્ણ બેઠક યોજાવા જઈ રહી છે. કેન્દ્રીય ગૃહમંત્રી અમિત શાહ આજે 'સીમાંત જિલ્લા પોલીસ અધિક્ષક સંમેલન 2026' ને સંબોધિત કરશે. આ હાઈ-લેવલ કોન્ફરન્સમાં દેશના સંવેદનશીલ સરહદી વિસ્તારોમાં સુરક્ષાના માળખાને વધુ સુદ્રઢ કરવા અંગે વ્યાપક મંથન કરવામાં આવશે.

વ્યૂહાત્મક રીતે અત્યંત મહત્વપૂર્ણ એવા સરહદી વિસ્તારોના જિલ્લા સ્તરીય પોલીસ નેતૃત્વને એક મંચ પર લાવીને, સરહદ સુરક્ષા માટે વધુ સંકલિત અને અસરકારક અભિગમ વિકસાવવો એ આ સંમેલનનો મુખ્ય હેતુ છે.

બેઠકના મુખ્ય એજન્ડા અને મહત્વના મુદ્દાઓ

બેઠકમાં કેન્દ્ર અને રાજ્યો વચ્ચેના પરસ્પર સંકલનને વધુ મજબૂત કરવા પર વિશેષ ભાર મૂકવામાં આવશે, જેથી સરહદી ગુનાઓ સામે ત્વરિત પગલાં લઈ શકાય. આંતરરાષ્ટ્રીય સરહદો પરથી થતી ગેરકાયદેસર ઘૂસણખોરીને રોકવા માટેની નવી વ્યૂહરચનાઓ અને સુરક્ષા એજન્સીઓ વચ્ચે વધુ સારા તાલમેલ દ્વારા પ્રવૃત્તિઓ પર નજર રાખવાની પદ્ધતિઓ પર ચર્ચા થશે. દેશમાં ગેરકાયદેસર રીતે વસવાટ કરતા વિદેશી નાગરિકો અથવા શંકાસ્પદ વ્યક્તિઓની ઓળખ કરવા માટેની હાલની પ્રક્રિયાઓની સમીક્ષા કરવામાં આવશે અને આ આખી પ્રક્રિયાને વધુ સચોટ બનાવવાની દિશામાં પગલાં લેવાશે.

શા માટે મહત્વનું છે આ સંમેલન?

સરહદી જિલ્લાઓની પોલીસ દેશની સુરક્ષા માટે પ્રથમ રક્ષા પંક્તિ તરીકે કામ કરે છે. બદલાતા સમય સાથે ડ્રોન થ્રેટ, ગેરકાયદેસર વસ્તી વિષયક ફેરફારો અને તસ્કરી જેવા પડકારોનો સામનો કરવા માટે તમામ એજન્સીઓ વચ્ચે તીવ્ર સંકલન જરૂરી બન્યું છે, જેના ભાગરૂપે આ સંમેલનનું આયોજન કરાયું છે.

આ કોન્ફરન્સમાં ગૃહ મંત્રાલયના વરિષ્ઠ અધિકારીઓ તેમજ પાકિસ્તાન, બાંગ્લાદેશ અને નેપાળ સરહદને અડીને આવેલા રાજ્યોના ઉચ્ચ પોલીસ અધિકારીઓ પણ ઉપસ્થિત રહેશે. બેઠકના અંતે દેશની આંતરિક અને સરહદી સુરક્ષાને વધુ મજબૂત કરવા માટે એક સમાન રોડમેપ તૈયાર કરવામાં આવશે.