જર્મન ચાન્સલર ઓલાફ સ્કોલ્ઝ ભારતની બે દિવસીય મુલાકાતે આજે નવી દિલ્હી આવી પહોંચ્યા

તેઓ આજે પ્રધાનમંત્રી નરેન્દ્ર મોદી સાથે બંને દેશોના વિકાસ અને વિશ્વ શાંતિ સંબંધિત તમામ સંબંધિત મુદ્દાઓ પર ચર્ચા કરશે

જર્મન ચાન્સેલર ઓલાફ સ્કોલ્ઝ ભારતની બે દિવસીય મુલાકાતે આજે નવી દિલ્હી પહોંચ્યા છે. તેમની સાથે વરિષ્ઠ અધિકારીઓ અને ઉદ્યોગપતિઓનું ઉચ્ચ સ્તરીય પ્રતિનિધિમંડળ પણ છે. સ્કોલ્ઝનું રાષ્ટ્રપતિ ભવનમાં પરંપરાગત સ્વાગત કરવામાં આવ્યું હતું. આ પ્રસંગે પ્રધાનમંત્રી નરેન્દ્ર મોદી અને વિદેશ મંત્રી ડૉ. એસ. જયશંકર ઉપસ્થિત રહ્યા હતા.

ચાન્સેલર સ્કોલ્ઝે પત્રકારોને જણાવ્યું હતું કે આ મુલાકાત ભારત અને જર્મની વચ્ચેના સંબંધોને વધુ મજબૂત કરશે. તેમણે કહ્યું કે તેઓ આજે પ્રધાનમંત્રી નરેન્દ્ર મોદી સાથે બંને દેશોના વિકાસ અને વિશ્વ શાંતિ સંબંધિત તમામ સંબંધિત મુદ્દાઓ પર ચર્ચા કરશે. ચાન્સેલર સ્કોલ્ઝ પરસ્પર, પ્રાદેશિક અને વૈશ્વિક મુદ્દાઓ પર ચર્ચા કરશે. બંને નેતાઓ અગ્રણી વેપારી પ્રતિનિધિઓ અને સીઈઓ સાથે વાતચીત કરશે. ચાન્સેલર સ્કોલ્ઝ રાષ્ટ્રપતિ  દ્રૌપદી મુર્મુ સાથે પણ મુલાકાત કરશે.

2011માં દ્વિવાર્ષિક આંતર-સરકારી પરામર્શ વ્યવસ્થાની સ્થાપના થઈ ત્યારથી જર્મન ચાન્સેલરની ભારતની આ પ્રથમ મુલાકાત છે. આંતર-સરકારી પરામર્શમાં, બંને દેશોના પ્રધાનો તેમના અધિકારક્ષેત્રના વિષયો પર ચર્ચા કરે છે 

ભારત-જર્મની ભાગીદારી સહિયારા મૂલ્યો, વિશ્વાસ અને પરસ્પર સમજણ પર આધારિત છે. બંને દેશો વચ્ચેના સંબંધો વધતા રોકાણો, મજબૂત વેપારી સંબંધો અને હરિયાળા અને ટકાઉ વિકાસના ક્ષેત્રમાં સહયોગથી મજબૂત બન્યા છે. ભારત અને જર્મની વચ્ચે બહુપક્ષીય અને આંતરરાષ્ટ્રીય મંચોમાં પણ સહકાર વધ્યો છે - ખાસ કરીને યુએન સુરક્ષા પરિષદમાં સુધારાના મુદ્દા પર.